FCS&CA Minister leh Kolasib A/C bialtu MLA ni bawk Pu K.Lalrinliana chuan vawiin khan Kolasib St.John’s Higher Secondary School kum 60 tlin (Diamond Jubilee) lawmna hun chu khuallian niin a hmanpui.

Khuallian chuan Kolasib khua in Mizorama sikul tha ber pawl a nei thei chu District mipuite tan vanneihna ani tiin he sikul hian Mizorama mi chhuanawm tak tak te a lo chhuah nual tawh a Monfort Brothers ten rawngbawlna ah ngaia zirna kawnga an hmalakna te chu mipuite tan malsawmna a ni a ti. St.John’s a Principal lo ni tawh te leh zirtirtu lo thawk tawh zawng zawngte bakah la thawk mekte inpekna chu fakawm a tih thu tarlangin St.John’s HSS chuan hmalam hunah malsawmna a dawn zel theihnan duhsakna a hlan bawk a ni.

Minister chuan Zirlai kalkhawm te fuihin Mizorama sikul hlun tak leh tha ber pawla an zir thei chu an vanneih zia hria in zirna kawnga chona pe tu nise a duh thu a sawi a, Ei leh bara intodelh tur chuan zirna hi a pawimawh ber ani a ti. Hringnun ti hmasawn tura mi tangkai ber pawl chu zirtirtu te an ni tiin zirlai naupangte pawhin hei hi hria in Sikul thaa an luh chhung in nundan mawi, taihmakna, tumruhna bakah awmze neia lehkha an zir theihnan an hun tha neih chu hmang tangkai turin a chah a ni.

Pu K.Lalrinliana chuan lehkha alo zir ve tawhna (1973-1977), Kolasib tana Rohlu tling St.John’s Higher Secondary school chu alo vul zual zel theihnan Zirtirtute leh zirlai te chu zirna kawngah tan la sauh sauh a hlawhtlinna chang chhunzawm zel turin duhsakna a hlan a, School thawmthat nan MLA fund cheng nuai 5 a hlan bawk a ni.

Jubilee lawmna ah hian Batch hmasa ber(batch of 1959) te chawimawina hun hman anih bakah zirlai ten ennawm chi hrang hrangin kal tlangin kalkhawm zirlai dang bakah zirlai nu leh pa te an awi a ni.