FCS&CA Minister leh Kolasib A/C bialtu MLA ni bawk Pu K.Lalrinliana chuan vawiin khan Kolasib St.Joseph’s Parish Hall ah thingtlang khawfai inelna Swachh Survekshan Grameen 2019 chu Kolasib District tan a hawng.

Khuallian chuan Sawrkar laipuiin faina leh thianghlimna a vei a, Mizoram-ah pawh faina kawngah nasa takin hmalak chhoh a ni a, hemi kawnga hmasawnna kan neih te chu thil chhinchhiah tlak tak ani a ti. PHE Department leh UD &PA Department te chu thingtlang leh khawpuia Swachh Bharat hmalakna kengkawhtu, mipui zirtirtu an ni a, kawng hrang hrangin Sawrkar, pawl leh khawtlang angten hmalakna a awm a, faina leh thianghlimna pawimawhnate kan hre chho zel chu lawmawm a tih thu tarlangin chutih rualin faina emaw thil dangah pawh nise Sawrkar hmalakna reng rengah mipuite hian mawhphurna kan nei tel ve thin ani tiin hmalakna ti hlawtling tur chuan mipuiten kan mawhphurna kan hlenchhuah ve a ngai a chu chuan rah tha a chhuah dawn ani a ti.

Mitin hian mahni zawn theuhah faina leh thianghlimna kawngah mawhphurhna kan nei vek a ni tih kan hriat theuh a ngai a ni tiin he programme a lo hlawhtlina ram fai leh thianghlim, hnam hrisel kan nih theih nan faina kawnga hmalakna chu theihtawpa thlawp turin mipuite a sawm a, mipuite zirtirtur leh hmalak pui turin khawtlang hruaitute a sawm bawk a ni.

Swachh Bharat Mission (Grameen) Chairman leh Kolasib Bawrhsap ni bawk Pu Zoengsanga pawhin thu sawiin ODF a kan inpuang thei chu thil lawmawm tak a nih rualin kan ODF dan te hi belhchian dawl ani em tiin mahni kan inzawh fo a ngai ati a, inthiarna thianghlim leh felfai neih ngei a ngai a, bawlhhlawh paih inthladah loin, kan tui tlan hnar te, in leh a chhehvel te tih fai paih ila, pawn lam chauha nalh lovin inchhungkhur leh nitin nunah faina hi kan nunpui a ngai ani tiin chu chuan natna hrang hrang lakah min venghim dawna , hriselna a tan faina hi a pawimawh ber ani a ti.

He hunah hian Swachh Prerak Day hman nghal ani a, Kolasib District a WATSAN titha khaw 10 khamrang, N.Hlimen, Phainuam, Serkhan, Phaisen, Buhchangphai, Lungdai,Hortoki, Saipum leh Bukpui khua te chu chawimawina hlan niin endikna hmasa lama District chhunga thingtlang khawfai ber ‘Phainuam’ chu lawmman pakhatna pawisa fai cheng 40,000/- leh memento, Pahnihna ‘Serkhan’ cheng 30,000/- leh memento Pathumna ‘Phaisen’ cheng 20,000/- leh memento hlan an ni.