Vawiin khan District Programme Officer, Lunglei buatsaihin an Office Conference Hall, Zotlangah Rashtriya Poshan Maah’ (National Nutrition Month) pualin hun hman a ni. He hunah hian Lunglei CMO Dr Thani Pachuau chu khuallian a ni.

Dr Thani Pachuau chuan Poshan Abhiyan chu sawrkar laipui Flagship Programme pakhat, naupang te, nu naupai mek te leh hnute hne lai fa nei mekten ei tur tha an hmuh theihna hmalakna a ni tiin Department hrang hrang tangkawpin he hmalakna Rashtriya Poshan Maah hi an kalpui tur thu a sawi a. National Nutrition Month thiltumte ti hlawhtling turin mipui, a bik takin khawltang hruaitute an pawimawh takzet a ni tiin hmalak puiah a sawm a ni. Mipuite hriselna ti hmasawn turin Health & Family Welfare Department chuan theihtawp a chhuah zel thu sawiin Sub Centre, PHC te tih changtlunna tura chaka taka hmalak mek a nih thu a sawi bawk. Naupang, nu nau pai, tleirawl leh hmeichhiaten an mamawh ang eitur tha leh hrisel an dawn theihna tura theihtawp chhuah theuh turin a sawm bawk.

He hun HI Pi C. Duhveli Lunglei DPO in kaihruaiin Pu Martin Lalrinsanga SDO PHE pawhin thusawina hun a hmang a ni. Khawltang hruaitu, tlawmngai pawl leh line department te an tel tha hle.