Vawiin khan Lawngtlai District Water & Sanitation Committee (DWSC) buatsaihin Lawngtlai DC Conference Hall-ah faina lama thingtlang khuate inelna tur, Swachh Survekshan Grameen 2019 hawnna leh faina kawnga hna thawktute chawimawina leh infuih tharna ni, Swachh Prerak Day hman a ni.

Swachh Survekshan Grameen 2019 hi Lawngtlai District tan Additional Deputy Commissioner Pu B. Lalchhawntluanga, MCS chuan hawngin, sawrkarin faina lama hma a lakna chu rei lo te chhungin a hlawhtlinna hmuh theihin a awm der a, hma sawn zel turin tha thlah lova tan tlat a tul a ni, a ti a. Lawngtlai District chu thingtlang khaw tamna a nih avangin faina kawngah pawh district dang aia nasa zawka hma lak a ngai a ni tiin, faina pawimawhzia uar zawka inzirtir a, theih tawp chhuah tlang turin Swachh Bharat Mission (Gramin) lama thawktute leh mipui kal khawmte a chah nghal.

He hun hi SBM (G) hnuaia Lawngtlai District Consultant Pu Benjamin Lalrinzuala'n a kaihruai a. Lawngtlai DWSC-a Member Secretary, PHED Executive Engineer Er Netralal Jaisi chuan hun hman chhan leh fuihna thu tawi a sawi a. Lawngtlai District chhunga thingtlang khuate zinga faina kawnga hma la tha khua leh thawktute chawimawina hun hman  a nih bakah, PHED-a thawktute leh kal khawmte hnen atangin thu sawi ngaihthlak a ni bawk.

Swachh Prerak Day pual hian Lawngtlai District chhunga thingtlang khaw fai berah Cheural, pahnihna Hmunlai leh pathumna Lunghauka te thlan niin, lawmman pawisa fai leh thuziak tar mawi hlan an ni a. Hei bakah hian PHE Department atanga faina kawnga hma lakna viltute chu chawimawina hlan an ni a, Village WATSAN Committee thawk tha sawm (10) leh faina lam mi dangte zirtir a, chawk phurtu village sanitary volunteer thawk tha sawm (10) hnenah lawmman hlan a ni bawk.

Vawiin hun hmanah hian PHED-a thawktute, DWSC member-te, khaw hrang hrang WATSAN Committee ai awh leh lawmman dawngtute an kal khawm a ni.