Vawiin khan Champhai DC Conference Hall-ah Poshan Abhiyaan (National Nutrition Mission) hnuaia District chhunga Rastriya Poshan Maah (National Nutrition Month) kalpui mek leh kal zel dan tur thlirin District Level Convergence Committee chu Chairman Dr Naveen Aggarwal, Bawrhsap hovin an thukhawm.  

Chairman chuan Poshan Maah tha taka kalpui anih theihna tura tanho a ngaih thu a sawi a. A  tum ber Naupang, tleirawl leh nu ten hriselna leh chawtha chungchang an lo hriat theihna turin hemi chungchang hi a  zau thei ang bera puanzar angai a ni, a ti a. District chhunga Tleirawlte a  tam thei ang ber  Iron an tlakchham leh tlakchham loh en a,  Hb test neih a tul thu leh Hb hniamte damdawi tha pek leh ei tur tha kawhhmuh zel nise tha a tih thu a sawi bawk.

Pi WC Zorammawii DPO & Member Secretary, District Level Convergence Committee on Poshan Abhiyaan chuan National Nutrition Month (Rastriya Poshan Maat) hun chhunga District level anga hmalak dan tur hrang hrangte a tarlang a. Undivided Champhai District chuan  Poshan Maah hman mekah theihtawp a chhuah zel thu leh district activities nei tha ber pawl anih thu a sawi a. A theih ang zela District level leh block level a thil tihte inpaizawn a thawhho zel angaih thu sawiin, Poshan Maah chhunga tawiawmna tha tak a awm theih nan mitinte thlawpna a ngen a ni.

Meeting-ah hian September thla  Rastriya Poshan Maah hman hun chhunga District level activities  atana kartina thil tih dan tur hrang hrangte sawiho niin,  Rastriya Poshan Maah hun chhung hian kartin thupui hrang hrang neia hmalak mek zel anih thu leh  kartin thutiam lak, Home Visit leh Jan Andolan dashboard a thiltih report leh thlalak te thawn zel anih thu tarlan a ni a.  Meeting chuan Poshan Maah chhungin eitur tha abikin Iron tamna lam inzirtirna kawnga zau zawka mipuite zirtir nise a ti a. Ruahman dan chuan naktuk  September Ni 12, 2019 (Nilaithawhtan) chawhnu dar 1 hian huapzau taka Poshan Rally Darthangvunga Traffic Point leh DK Traffic Point inkarah neih tum a ni a, hemi hnu hian Recipe demonstration, Defeat Diarrhoea Campaign, Anaemia Prevention leh Hygiene and Sanitation Campaign-te neih tum a ni bawk.  A kar thumnaah School Based Events  leh Seminar te neih tum niin,  September kar tawp berah Self Help Group te zirtirna pek,  School Based Event huihawt  bakah hian Early Childhood Care and Education (ECCE) kaltlangin Nau hnute pek pawimawhna leh hriat tur pawimawhte inhrilhhriatna hun neih leh tum a ni bawk.

Poshan Abhiyaan (National Nutrition Mission) hian India ram a Chaw tha tlakchhamna umbo a tuma, hemi hmang hian Anganwadi hnathawkte hman tangkai leh thuamthat mek a ni a. National Family Health Survey-4 a Naupang than thu (Stunting) 38.4% chu kum 2022 ah 25% a tlakhniam tir tuma hmalak a ni a. Naupang, Tleirawl (Adolescnet Girls) leh Nu-ah thisen tlakchhamna Anaemia hluar lutuk chu 3% a tihhniam tum a ni bawk. 1000 Days Mission hmangin Nu in nau a pai atanga naupangin kum 2 a pumhlum thlenga  Chaw tha mumal tak a dawn theihna tura tanpuina pek a, naute thi leh nau chunga thi leh naupian hlima buk zang lutuk awm lo tura hmalak tum a ni a.  Kumin National Nutrition Month-ah hian theme chi hrang hrang: 1000 Days; D 2 Campaign-Defeat Diarrhoea; Diet Diversity-Complementary Feeding; Anaemia Prevention T 3 Camp-Test, Treat, Talk Anaemia leh Hygiene, Sanitation and Safe Drinking Water tihte thlan a ni.

Mizoram Sawrkar hi Poshan Abhiyaan hmalakna kaltlanga India rama titha berte zingah a tel a. Tunhnaia  New Delhi a tithate lawmpuina hun hmanah khan Overall Excellence in Implementation

(Excellent Award State/UT, Category Group-III )  pakhatna leh ICDS CAS Implemetation ti tha ber nihna  a hauh a ni.