4084/2023-2024

Aizawl, the 8th March, 2024: Vawiin chhun dar 12:00 khan District AIDS Prevention and Control Committee (DAPCC), Champhai District chu an Chairman Pu James Lalrinchhana, District Bawrhsap hovin Champhai District chhunga Private School-te tana Adolescents Education kalpui dan tur chungchang ngaihtuahin DC Conference Hall-ah an thukhawm.

Meeting kaihruaitu DAPCC Chairman & District Bawrhsap Pu James Lalrinchhana chuan nakin lawka ram leh hnam innghahna la ni mai tur zirlai naupangte hmakhua ngaia chak zawka adolescents education kalpui a tul thu sawiin, ruihhlo hman khawlohna leh AIDS hluar zel tur do kawnga pawimawhte inhrilhhriatna hun neih tam deuh deuh a pawimawh thu a sawi a. Kalkhawmte chu sawrkarin programme tha tak tak a duante tihlawhtling tura theihtawp chhuah zel turin a chah a ni.

He hunah hian Champhai District chhunga Private Middle School, High School leh Higher Secondary School hrang hranga zirlai naupangte tana adolescents education programme kalpui dan tur rel a ni a. HIV/AIDS hluar leh darh zel tur do bakah drugs hman khawlohna ven kawnga zirlai naupangte zirtirna petu tur zirtirtute tana training pek hmasak dan turte sawiho a ni a. Thukhawm chuan DAPCU, DEO leh SDEO Office-te chu private school neih dan leh zirtirtu training turte lo zirchianga a tul anga ruahmanna lo siam turin a ruat a. Training tur hian private school tin atangin zirtirtu 2 (mipa leh hmeichhia) te thlan tur niin batch hniha training buatsaih ni se tih a ni a; training hun tur atan March ni 12 atanga 15, 2024 leh March ni 18 atanga 21, 2024 te chu ruat a ni.

DAPCC meeting chuana adolescents education programme atana course content leh master trainer chungchang chu DIET Champhai kutah a dah a. Training tur hian Champhai District-a private middle school 43 atangin zirtirtu 86, high school 11 atangin zirtirtu 22, higher secondary school 5 atangin zirtirtu 10, avaiin private school 59 atanga zirtirtu 118 te chu adolescents education chungchanga training buatsaiha tel tura ruahman a ni a. Khawpui pawn atangin school 36 (middle school 22, high school 10 leh higher secondary school 4) leh khawpui chhunga school 23 (middle school 10, high school 9 leh higher secondary school 4) te chu thlan an ni a. Zirtirtu training tura kohte hian an thawhna school theuha zirlai naupangte training an pe ve leh dawn a; training leh hmalak zui dante DAPCC in ngun takin a vil dawn a ni.