Vawiin khan Champhai District chhunga Birth & Death Registrar-te pualin Birth & Death Registration siam dan chungchangah Training buatsaih a ni.

Pu Saidingliana Sailo, District Research Officer, Champhai  chuan Birth & Death Registrar-te chu ram rawngbawltu pawimawh tak an nih thu leh thlemna tawh chang pawha rinawm taka thawk turin a chah a. Hamthatna tam zawk duh vanga kum ziah naupan chu thil thalo tak midangte thlenga nghawng thei a ni, a ti a. DRO Office  District Office fai bera thlan an nih theihna kawnga thawktute inpekna a fak bawk.

Zirtirna petu Pi C. Lalthanmawii, Research Officer, Directorate of Economics & Statistics, Aizawl chuan Registrar of Birth and Dead (RBD) te thawhrimna avangin kum  2018 ah Birth & Death Register chu za a za anih thu sawiin,  Birth Certificate siamin  address ziah uluk a ngaih thu leh an pianna hmun thlenga ziahdanah an fimkhur a tul thu a sawi a, dik lova ziah a awm thin avanga harsatna an lo tawh thin tawhte a tarlang nghal a.  Birth Certificate chhinchhiaha ziahluh tawh zawng zawngte chu Computer-ah dah that vek a nih tawh thu sawiin, Birth Certificate siam that ngai emaw, tibo emaw an awm chuan awlsam takin Computer hmanga an en zung zung theih thu leh Certificate nei kawpte pawh an hriat nghal zel theih thu a sawi a. Birth Certificate tibo te'n siam that an mamawhin Police Verification an phut thin chu mipuite tihbuaina mai maia an ngaih avangin an tihtawp thu a sawi a, Death Certificate-ah erawh chuan Police Verification phut reng a la ni, a ti bawk.

Chawhnu lamah Pu H. Lalhmangaihzuala, Inspector of Statistics, Champhai kaihhruainain Training hi neih chhunzawm a ni a. Pu J. Ramdinmawia, Inspector of Statistics, Directorate of Economics & Statistics, Aizawl chuan training hi pein, India ramah Registration of Birth & Deaths Act hi kum 1969 a siam anih thu lehh chumi zulzui chuan State hrang hrangah RBD Rules siam a ni, a ti a.  Mizoramah chuan RBD Rules hi kum 1978 ah siam niin, Registration hna tak chu kum 1985 July ni 1 atanga thawh tan anih thu a sawi a. Kum 2007 ah Mizoram chuan, The Mizoram Registration of Birth & Death Rules 2007 tih siam  lehin, kum 2015 khan thawmthat  niin hei hi tun thlenga hman zel a ni, a ti bawk.

Training-ah hian District chhunga Registrar of Birth & Dead (RBD) te an tel tha hle a ni.