State Election Commission (SEC) ruahmanna angin vawiin khan Lawngtlai District Election Officer (DEO) Pi Shashanka Ala, IAS chuan Lai Autonomous District Council (LADC) hnuaia Village Council (VC) pahniha hmun ruak pathum hnawh khah nana by-election neih tur atana electoral roll siam thar tur behchhana hman tur draft electoral roll chu a office chamber-ah a tlangzarh a. Draft electoral roll hi political party ai awhte hnenah a hlan nghal.

Draft electoral roll-a a lan danin, LADC hnuaia 26-Hmunnuam Village Council-ah vote nei mipa 147 leh hmeichhia 141, an vaiin voter 288 an awm a; 50-Kakichhuah Village Council-ah vote nei mipa 69 leh hmeichhia 91, an vaiin voter 160 an awm thung. Hmunnuam VC-ah hian hmun ruak hnawh khah tur pakhat awmin, Kakichhuah VC-ah hian hnawh khah tur pahnih a awm bawk.

Vawiina tlangzarh tak draft electoral roll atanga paih ngai emaw, belh ngai emaw, siam that tur emaw neite tan November ni 2, 2019 atanga November ni 4, 2019 chhungin claim & objection hun hawn a ni a. Mitthi tawh emaw, vote nei kawp emaw an awm chuan paih tur niin, January ni 1, 2019-a kum 18 tling chin roll-a la chuang lote chu thun belh theih a ni bawk. Final electoral roll hi November ni 13, 2019-ah tlangzarh tura ruahman a ni.