990/2023-2024

Champhai, the 30th June, 2023: Remna Ni champhaphak vawi 37-na pualin vawiin khan Champhaiah Remna kawngzawh, thingphun hnatlang, Health Camp leh Faina hnatlangpui te buatsaih a ni.

Remna Ni pual kawngzawh huaihawtah District Bawrhsap Pu James Lalrinchhana chuan kalkhawmte chu remna leh muanna hlut zia hre thar leh tura chahin, remna chuan hmasawnna, thawhhona tha, inunauna leh inthianthatnate bakah inlungrualna a thlen a ni, a ti a. Thenawm ram buai avanga harsatnate'n remna leh muanna hlutzia min hriat chhuah tir thu sawiin, remna leh muanna hnuaia kan len lai, hun tha kan neih lai hian ram hmasawn leh changkang siam tura tan kan lak zel a pawimawh a ni, a ti a. Remna leh muanna hnuaia kum 37 lai kan awm ta chu ropui a tih thu sawiin, District mipuite chu remna leh muanna ngaihlua vawngnungtu nih tun theuh turin a chah a ni.

He hunah hian DFO Champhai Pu Lalduhthlana pawhin thu sawiin, remna chu mihringte inkarah chauh ni lo, thil siam dangte leh nungchite nena inkar thlenga chhawmnun a tul thu a sawi a. Hetiang lam hawia Department hmalakna Nature Learning Centre kalpui chhoh mek leh adangte a tarlang bawk.

Remna Ni pual kawngzawh Peace Walk hi tukin dar 7 khan CHANEM tualzawl atanga Circuit House thlenga neih a ni a. Sawrkar hnathawk, Zirlai, NGO, Ex-servicemen leh Assam Rifles-te an tel a, hemi hnu hian NH 6 kawngpui kam Khankawn Police Checkgate, Chalbawia Junction leh Chhungte inkarah remna ni champha vawi 37-na hriatreng nan Tlaizawng tiak 37 chu District Bawrhsap Pu James Lalrinchhana hova phun a ni bawk.

Tukin vek khan Remna Ni 2023 lawmna pualin Champhai District veng/khua hrang hrangahte VC te kaihhruaiin faina hnatlangpui buatsaih a ni bawk.

Heng bakah hian vawiin nileng khan Ngur khuaah District Hospital Champhai leh Ngur VC tangkawp buatsaihin Remna Ni pual Free Health Camp huaihawt a ni bawk a, Medical Staff 16 te thawkchhuakin he hunah hian inentir mi 386 an awm tling a, in lama panchilh mi 2 an awm bawk.