991/2023-2024

Vawiin ni 30.6.2023(Zirtawpni) hian Kawlkulh MZP Sub-Headquarters-in HSLC leh HSSLC-a ti tha te chawimawina hun an buatsaih, Kawlkulh Town Hall-a neih chu Lengteng bialtu MLA Dr. L.Thangmawia'n a hmanpui.

He hunah hian thusawiin Dr Thangmawia chuan Kawlkulh khua atanga HSLC leh HSSLC tha taka pass te a lawmpui thu leh MZP in hetianga chawimawina leh lawmpuina hun an buatsaih chu fakawm a tih thu a sawi a.

Dr. Thangmawia chuan Covid hun thim Mizoramin kan paltlang lai pawhin zirna hi a chawl ve lo a, a theih ang angin online leh offline mode te a zirna kalpui a ni a, India ram Board tamtak zingah MBSE chu Covid laia Board Exam kalpui thei awmchhun an ni a, Board dangin an rawn zirchiang hial a ni. Hetiang a nih theihnana zirtirtute, Education department-a thawktute thawhrimna hi Zoram mipuite ten hriat nawn fo tlak a ni a ti a, Zirlaite chu tum mumal nei tura fuihin "Tum mumal nei lo zirlaite chu Goal awm lova football khel ang an ni a, hlawhtlin a harsa fo thin. Mahni chak zawng leh tui zawng damchhunga kan thawh theihnan tum mumal kan neih a ngai a, kan tum tihlawhtling turin Pathian rawn chunga nasa taka kan thawh a ngai a, zirlai ten in hun kal zel turah khawtlang tan leh Mizo hnam tana chhenfakawm ni thei tura taima taka in zir chhunzawm zel ka duh takzet a ni" a ti.

He hun hi Zoremsiama, President, MZP Sub-Headquarters, Kawlkulhin a kaihruai a, Lalchhanchhuaha Renthlei, Fin. Secretary, MZP Sub-Headquarters, Kawlkulhin lawmthu sawiin hun a khar a ni.