992/2023-2024

Khawzawl, 30th June 2023 : Vawiin khan Zaingen Branch YMA Hall, Khawzawlah Remna Ni vawi 38-na urhsun taka hman a ni a, bialtu MLA, Deputy Chief Minister ni bawk Pu Tawnluia'n khuallian niin a hmanpui.

Thuchah sawitu Deputy Chief Minister Pu Tawnluia bialtu MLA ni bawk chuan Khawzawl District mipuite chu Remna Ni chibai bukin Remna Ni chu Zoram mipuite thawhchhuah, Zoram mipuite tana siam a nih avangin kan zavaia kan ta a ni a ti a. Chuvangin remna tluantling kan neih a, Remna Ni kan hman chhunzawm zel theihnan zoram mipuiten rilru leh thinlung zawng zawng nen theihtawp kan chhuah zel a pawimawh a ni a ti. Kohhran hruaituten remna kan neih theihna tura hma an lak dan, lu chhum ban chhum huama huaisen taka an thawh thinna a zahawmin a chhuanawm em em a, hei hi thangtharte pawhin kan theihnghilh thiang lova, Pathian mite ban pharna avanga bul tan thei kan nih avangin Pathian duh dana kan kal zel hi a pawimawh a ni a ti bawk.

Pu Tawnluia chuan Zoramin zalenna a sual laia nunna hla tu hnam sipai martarte zahna chibai bukin Zoram mipuiten kan hre reng dawn a ni a ti a. Chutih rualin hnam sipai lo hawte zinga nunna chan tawh te leh la dam mekte pawh zahna chibai kan buk thar leh a ni a ti bawk a. An inpekna avanga tun dinhmun thleng leh ram ralmuanga khawsa thei kan ni hi a hlut zia kan theihnghilh thiang lo a ni a ti a. India sawrkar leh ramhnuai sawrkar inbiakna zawng zawngah Pu Laldenga nen an tel kim vek tih sawiin a harsatzia leh a hautakzia hrechiang bertute zinga mi a nih thu a sawi a. Hnam sipaite rilru huaisen zia leh an nunna hlan vek huam khawpa an inpek thu sawiin an beidawng lova, chutih lai mekin Zoram mipuite, kohhran, political party hrang hrangte leh tlawmngai pawl hruaitute ngenna an zah avangin remna dawhkan an kil ve chauh a ni a ti a, tlawm vanga haw an nih loh thu a sawi a. Zoram mipuite tana rammu leh inpumpek an nih vangin mipuite duhdan kalha chet an duh lova, ram leh hnam hmangaih vang zawkin an rawn chhuak tih a sawi a ni.

Remna Thutlung in a ken tel thil tam tak zingah Mizoram chu state puitling a hlankaia Ram Danpui hnuaia Article 371G a bika venhimna pek a ni te, India danpuiin Mizoram tan bik liau liaua dan chi hrang hrang kan ram leh hnam inhumhimna tur a siamte a sawifiah bawk a ni.

Zirlai chhuanawmte chawimawina hun hman nghal a ni a. Khuallian hian a lo tiam tawh angin Mizoram University-a Ph.D bei mektu mi 6 hnenah laptop a hlan a, chungte chu :

1. Olivia Lalremsangi d/o G. Laldinliana, Zuchhip, Khawzawl
2. PC Lalrindika s/o PC Vanrammawia, Zuchhip, Khawzawl
3. C. Lallianzuala s/o Lalbiakenga, Khawzawl Dinthar
4. Zosangliana Ralte s/o R. Hrangchhuana, Khawzawl Vengthar
5. H. Zohmingliana s/o H. Lalremmawia, Khawzawl Vengthar
6. Lalthaduha s/o K. Lianvela, Khawzawl Zaingen

Remna Ni puala School Education Department in inelna chi hrang hrang a buatsaih lawmman a sem nghal a, chungte chu :

Quiz Competition (High School-level)

Pakhatna : Vanlalrova & Vanlalchhanhimi - PES, Khawzawl
Pahnihna : K. Lalnunfeli & Lalhriatpuii - Govt. Khawzawl High School
Pathumna : Lalhmangaihsangi & B. Lalremruati - Model High School, Khawzawl

Essay Writing Competition (Higher Secondary School-level)

Pakhatna : Lalremruatpuii, Kawlkulh HSS
Pahnihna : Isak Malsawmdawngkima, Khawzawl HSS
Pathumna : Lalthanpuii, Kawlkulh HSS

Khuallian hian lawmman dawngtute hnenah hian chawimawina thuziak (citation) leh tangkafai a hlan a ni.

Mizoram pum huap Remna Ni pual zirna in intihsiakna a pakhatna dinhmun luahtu PES, Khawzawl hnenah lawmpuina a hlan bawk a ni.

Pu PC Rosiama, President, Sub-Hqrs YMA, Khawzawlin Khawzawl khaw indin tan dan leh rambuai vanga Khawzawl khua leh a chhehvelin a tawrh dan leh rambuai laia khaw 8 sawikhawma Khawzawl din thar leh a nih dan te a sawi a, tawrhna rapthlak tak an tawrh hnua tun dinhmun an thlen dan te a sawifiah a ni.

‘Remna Ni 2023' lawmna hun Khawzawla neih hi Pu K. Lalrohlua, Deputy Commissioner-in a kaihruai a, khuallian Deputy Chief Minister in Zaingen Branch YMA Hall a thlen veleh hian Khawzawl District MUP ten Hlado chhamin an lo lawm a ni. Upa PC Rohmingliana, Khawzawl Vengsang Presbyterian Kohhran chuan hunserh hmangin Pathian hnenah Remna Ni lawmna inkhawm a hlan a. Remna Ni lawmna inkhawmah hian Khawzawl District Amateur Taekwondo Association ten an thiam thil an entir a. Govt. Khawzawl High School, Khawzawl Hr. Sec.School, Sialhawk North Branch YMA, MZI Khawzawl Headquarters leh Ex-MNA/PAMRA Khawzawl ten zaipawl hla an rem a, Presbyterian English School, Khawzawl, Sub-Hqrs YMA, Khawzawl leh PES, Khawzawl Vengthar Pastorate ten hnam lam an entir bakah malzai mawi tak tak ngaihthlak a ni bawk a ni.