989/2023-2024

Dated Serchhip, the 30th June, 2023: Vawiin khan Remna Ni puala Hnahthial District Hospital-a ni hnih awh Health Camp neih chu a kharna hun hman a ni a, Health & Family Welfare Minister Dr R. Lalthangliana chuan a telpui.

Dr R Lalthangliana, Health Minister chuan thusawiin, Doctor thiam tak takin an hun hlu tak senga Health Camp Hnahthiala an buatsaih hi lawmawm ka ti hle a, an inpekna a ropui ka ti hle a ni. Mipuite pawhin an chhawr tangkaiin pantu an thahnem hle tihte kan hmu a, Camp hlawhtling tak niin ka hria a, a buatsaihtu leh thawktu zawng zawngte chungah lawmthu ka sawi a ni, a ti.

A kharna hun hi Hnahthial District Hospital Complex-ah neih a ni a, Dr Lalramliana, Principal Director, Health and Family Welfare-in kaihruaiin Dr Lalrengpuii, Senior Medical Officer, Hnahthial District Hospital chuan report tlangpui a pe a, camp ah hian dam lo 2000 vel an inentir tih a tarlang a, Sangau, Cheural, Lunglei leh Hnahthial chhehvela mite’n he Health Camp hi an rawn pan tih a sawi bawk.

Health Camp-ah hian Aizawl amangin thiamna bik nei doctor rualin dam lote hi an en a ni.