No.7161/2020-2021

Vawiin chawhnu khan Champhai DC Conference Hall-ah kumin January Ni 26 a Republic Day 2021 lo thleng tur lawm dan tur ngaihtuahtu Republic Day Celebration Committee  chu Addl. DC Pu R.Lalnghakliana  hovin an thukhawm.

Meeting chuan India ram ni pawimawh tak Republic Day 2021 chu Covid-19 hripui leng vangin kum dang anga ropui taka lawm theih ni dawn lo mahse, sawrkarin ruahmanna a duan zulzuia  lawmna hun buatsaih tha a ti a. Champhai District-a a lawmna pui ber tur chu DC chenna  Jericho Garden, Keifangtlangah Khuallian Pi Maria C.T.  Zuali, District Bawrhsap hovin zing dar 8 atanga neih tan nise a ti a. January Ni 25, 2021 chawhnu dar 2 ah inpuahchahna leh enchhinna hnuhnung neih nise tih a ni. 

Kum dang ang lo takin kumin Republic  Day lawmna hunah hian Parade Contingent leh Pipe Band-te an awm dawn lova, Police-te erawh Khuallian chhawna hnam puanzar chibai buk turin an intlar thung dawn a. He hunah hian Faina hapta 2020 hman zawh taka Champhai khawpui chhunga intihsiakna   category hrang hrang result puana lawmman hlanna neih nise tih a ni bawk a. Covid-19 hrileng laka inkaihhruaina State sawrkar duhdan angin Head of Office-te chauh leh fai inelna lawmman dawng turte chauh he hunah hian telh nise tih a ni. Republic Day lawmna hun hi mipuite tana thlir theih turin Cable TV pahnih CCN leh LCN ah te Live Telecast  hmanga chhuah nise tih a ni bawk.  

Meeting-ah hian Sawrkar department hrang hrangte hna chanpual siamfel nghal niin, Republic Day urhsun taka lawm anih theih nan mahni chanvo theuh hneh taka hlen turin meeting chuan mawhphurhna latu zawng zawngte a ngen a ni.

Vawiin meeting-ah hian Pu C.Lalengliana Addl. SP,  Pu Lalnunfela Chawngthu SDO Sadar leh Sawrkar Department hotute an tel a ni.