No.7162/2020-2021

Deputy Chief Minister Pu Tawnluia, Urban Development & Poverty Alleviation Department changtu ni bawk hovin vawiin chawhma khan UD & PA Department hnathawk te nen an Department Hall, MINECO ah inhlan tharna hun an hmang a, chawhnu lamah Deputy Chief Minister Pu Tawnluia leh Dr. C. Vanlalramsanga, Commissioner & Secretary, UD &PA Department hovin Department hnathawh te thlirletna Review Meeting an nei bawk a ni.

Deputy Chief Minister Pu Tawnluia chuan Department hnathawk zawng zawngte chu rilru tharin kum kalta aia hna thawk tha zawk tura inpuahchaha, rilru inbuatsaih tura chahin mahnia hmasawnna a awm loh chuan midangteah a langchhuak thei lo a ni, a ti. Department hnathawh pakhat zawk khawpuia cheng mi rethei leh mi chanhai te ngaihven leh chhawmdawl hna te chuan an hun tam zawk luah se tia a duh thu sawiin rethei zawkte tan thawk tur kan ni tih hre chungin an tan theihtawp chhuah zel turin ka chah duh cheu a ni, a ti.

Pu Tawnluia chuan Sawrkar hnathawkte chu mipuite tana rawngbawltu an nih angin mipui rawngbawl hna chu entik lai pawha dah pawimawh ber tur te, hun vawng dik tur te leh an mahni dawrtu zawng zawngte chu hawihhawm takin lo dawngsawnga, an thu leh hla thlen te ngaithla uluk a, mipuite tan theihtawp chhuah turin a fuih a. Pathian rawn chungin leh Amah tih chungin hna thawk turin a fuih bawk a ni.

Inhlan tharna programme hi Pu H. Lianzela, Director, UD &PA Department chuan kaihruaiin Rev. R. Lallianpara, Khatla Bialtu Pastor, PCI Mizoram Synod chuan tawngtai hun a hmang a ni.

Inhlan tharna programme zawha Deputy Chief Minister chuan UD &PA Office a fangkual a. Hemi zawha, Department Conference Room ah kum kaltaa Department hnathawh thlirletna Review meeting neiin kumin an hmalak dan tur pawh an sawiho a ni.

Review meeting-ah hian Dr. C. Vanlalramsanga chuan Department-in hlawhtlinna an hmuhte, an hnathawh leh hmalak mekna, a tlangpui a tarlang a. Department officer ten Scheme leh project hrang hrang an kalpui mek – National Urban Livelihoods Mission, Swacch Bharat Mission (Urban), AMRUT leh PAHOSS hnuaia hmalakna leh hmachhawp te an tarlang a. Town & Country Planning, Sanitation Wing, Accounts Branch leh Tehnical Branch te pawhin an hmalakna an tarlang bawk a ni.