No.7160/2020-2021

Vawiin khan Land Revenue & Settlement (LR&S) Department chuan Directorate ah inhlan tharna hun an hmang a. Minister Pu Lalruatkima chu khuallian niin LR&S Secretary Pu R.Zarzosanga chu khual zahawm a ni.

Pu Lalruatkima chuan COVID-19 avangin kum kaltaah harsatna kan tawk a, March 22 atanga tanin kumtluanin inkhuahkhirhna kan kalpui a, kan nunphung a khaihlak a, sawrkar tan pawh rorel thiam a har em em a, chutiang paltlanga kum 2021 dam taka kan chuangkai hi a lawmawm takzet a ni, a ti. Revenue Department kalphung chu danin uluk taka a phura, department dang nena kal dan inang lo a ni, Minister chuan a ti a. Chenna inhmun pe chhuaktu an nih avangin an mawhphurhna a sang em em a, mipui rawngbawltu, mipui nena indawr reng an nih avangin hawihawm leh taimak chhuah a ngai tih sawiin conduct rules in a phuar sawrkar hnathawk te chu danin tih leh tih loh tur a sawi te zawm a, mawhphurhna hlen turin a chah a ni.

Secretary Pu R.Zarzosanga chuan kum kalta chhunga Revenue Department hmalakna hrang hrang a tarlang a. Kum kalta chhung khan Land Revenue & Settlement Department chuan House Pass 302 leh Land Settlement Certificate 102 pek chhuah a nih thu te; land dispute case 268 chinfel a nih thu te; November 2020 thleng khan revenue cheng nuai 1095.31 leh Registration Fee & Stamp Duty cheng nuai 1884.81 an lakkhawm thu a sawi. Secretary chuan Revenue Department chu mi chhungkaw ro khawih a, kumkhaw ro pe chhuaktu an nih avangin an hnaah an fimkhur a ngai em em a ni, tiin thawktute a fuih a ni.

Revenue Director Pi Angela Zothanpuii kaihhruai programme-ah hian Revenue Minister Pu Lalruatkima chuan Survey Manual bu thar ber a tlangzarh nghal bawk a ni.