3376/2022-2023

Champhai DC Republic Day Speech.pdf

Champhai, the 26th January, 2023: India ramin mahni puala duan ram danpui a neih champhaphak hriatrengna India Republic Day vawi 74-na lawmna chu ram chhung hmun dangte rualin vawiin chawhma dar 10 khan Champhaiah neih a ni. Champhai District chhunga a lawmna pui ber hi Chhangphut Field-ah neih a ni a, Khuallian Champhai District Bawrhsap Pu James Lalrinchhana chuan hnam puanzar a pawtpharh a, Republic Day thuchah a sawi a ni.

Khuallian District Bawrhsap Pu James Lalrinchhana chuan India Republic Day vawi 74-na ni ropui tak pualin a lawmna huna kalte leh District mipui zawng zawngte duhsakna chibai a buk a. Khawvel ram zinga ram ropui tak ni chho mek India chuan hun harsa leh khirh tak tak a paltlang tawh thin dante tarlangin, kum 1947 August ni 15 a British awpna atanga ram zalen a nih atangin India ram hruaitute chuan dan leh hrai mumal taka kan inrelbawlna tur an duang a, November 1947 ah India Constitution an siam chu Constituent Assembly ngaihtuah atan thehluh a ni a, uluk taka zirchiangin an siamtha a, kum hnih hnu November ni 26, 1949 ah Assembly chuan pawmin document pawimawhte chu January ni 24, kum 1950 ah sign a ni, a ti a. India Constitution chu January ni 26,1950 ah hman tan niin India Constitution hian Government of India Act a luahlan a, India chu mipui ten an hruaitu an thlanchhuahna ram leh mahnia inrelbawina Dan mumal tak nei ramah a rawn chantir ta a ni, a ti bawk.

India Constitution hmahruaitu 'Preamble' chuan India chu Sovereign, Socialist, Secular, Democratic Republic State-ah a puang a. India Constitution-ah hian mipuite chanvo leh mawhphurhna pawimawh tak tak, Fundamental Rights leh Fundamental Duties te tarlan an ni a, khua leh tui tha te chuan heng hi kan zawm ngei tur a ni, a ti a. India ramin ram danpui a neih hran hnu kum 74-naah khawsak phung leh nundanah hmasawnna tam tak hmuh tur a awm thu sawiin, Sorkar Office pawimawh tak tak enkawltu Head of Office-te leh an thawhpuite chu mipui hmakhua ngaia thahnemngai taka thawk zel turin a sawm nghal bawk.

He hunah hian Khuallian chuan Champhai District-a Department hrang hrangte hmalakna thenkhat a tarlang a. Champhai District Water and Sanitation Mission chu October 2022 atan India ram District 165 zinga Three Star Category-ah Best Performing District-ah thlan a nih thu a sawi a. Champhai Police SI C.Lalsangliana'n hnathawh tha chawimawina Governor's Gold Medal a dawng thei chu lawmawm a tih thu a sawi bawk a. Hmasawnna dangte ngaihthah chuang lovin zirna, hriselna leh infiamnate tihhmasawn kawngah tanlak tum a nih thu a sawi a. District Magistrate thuchhuakte ngaipawimawha zawm turin District mipuite a chah a. Kawngpui leh inkawlpawhna tha nei tura tanrual a pawimawh thu sawiin, taksa rilru leh hmasawnna lam ngaipawimawh turin District mipuite a chah a. District-in pipute sulhnu hlu tak tak a neih chu vawnhima uluk taka enkawl a tul thu sawiin, khualzin tam tak min hipsaktu leh economy siamtha theitu an nihzia hre thar leh turin District mipuite a sawm a. Nitina min runtu ruihhlo chi hrang hrangte dona kawngah tan lak mar a ngai hle a ni tiin, Police leh Excise-te tha tichaka thawhpui tlattu NGO hrang hrangte leh kohhran hrang hrangte chungah lawmthu a sawi a. Khawtlang nun nuam tak leh him tak, hmasawnna kawng hrang hranga rual elna dik nena penchhuak nun nei turin District mipuite a sawm a ni.

Kumin Republic Day lawmnaah hian Parade contingent 18; Armed contingent 1, Unarmed Contingent 5 leh School Contingent 12 te bakah Aizawl atangin Govt. Mizo High Sçhool Pipe Band-te an tel a. Parade First Commander SI Joseph Vanlalauva leh Second Commander SI Liansangpuii te kaihhruaiin Republic Day Parade hmuhnawm tak buatsaih a ni a. Govt. Mizo High Sçhool Pipe Band display a awm bawk.

School Contingent tithate chu hengte hi an ni:
1) Pakhatna: Eastern Flower Academy
2) Pahnihna: Govt. Roseland School (Girls)
3) Pathumna: BC Lalthlamuana English Academy

Unarmed Contingent:
1) Govt. Champhai College NCC
2) Ex Servicemen
3) Scouts & Guides, Venglai Comprehensive M/S

Vawiin Republic Day lawmna-ah hian Champhai Town Cleanliness Competition 2022 puala faina intihsiakna lawmman chu Khuallianin a sem nghal a. Category hrang hranga lawmman dawngtute chu:
(A) VENG FAI:
1) Venglai
2) Ruantlang
3) Kahrawt
(B) OFFICE FAI:
1) DFO Office
2) DRO Office
3) DEO Office
(C) SCHOOL FAI:
High Sçhool/ Higher Secondary School/ College:
1) Vengsang H/S
2) Govt. GM H/S
3) Pinehill Academy
Middle School:
1) PES Zotlang
2) PES Tlangsam
3) Kanan M/S
Primary School:
1) Govt. Tlangsam P/S II
2) P/S IV Kanan Veng
3) P/S VI Bethel Veng
(D) ANGANWADI FAI:
1) Zotlang II
2) Vengthlang III
3) Venglai I
(E) RESTAURANT FAI:
1) Hotel Chawngthu
2) BSP Restaurant
3) Crispy Hut
(F) BAZAR FAI:
1) Bazarpui
2) Electric Veng Bazar
3) Bethel Bazar
(G) HOSPITAL FAI:
1) District Hospital Champhai
2) DM Hospital
3) Med-Aim Hospital

He hunah hian First DC's Trophy Champhai District Chess Tournament 2023 lawmman sem chhuah a ni bawk.
1) Pakhatna: Lalbiakzauva Khiangte, Vengthlang
2) Pahnihna: Lallianmanga, Kanan Veng
3) Pathumna: Lalpektluanga Tochhawng, Lianpui

Chhangphut Field-a hun hman zawh hnu hian chhun dar 12 ah Jericho Garden, Keifangtlang-ah sawm bikte pualin VIP's At Home neih a ni a. Republic Day lawmna puala buatsaih CDFA 2nd Division Football Tournament Final chu chawhnu dar 1:30 ah New Champhai FC leh Vengthar FC Team te'n an khel a ni.