3377/2022-2023

Aizawl 26th January 2023: Nimin ni 25.1.2023(Nilaini) chawhnu khan Hrianghmun khuaah kangmei chhuakin in 4 a kangral vek a, in pakhat erawh a then a zar kangin thlelhmih hman a ni.

Dr. Thangmawia chuan chhiattawh thu a hriat veleh nizan khan a zan a zanin a hmun panin a chhuak nghal a. A hmun a thlen veleh chhiat tawk chhungkua te tlawh kualin Sawrkar anga tih theih awm apiangah theihtawp chhuah a nih tur thu a hrilh a. In kang ral vek chhungkaw 4 te Rs 5000 theuh leh in kang ral lo chhungkua Rs 2000 a pek bakah Silpouline pakhat theuh a pe a, Hrianghmun khawtlang hruaitute hnenah hnatlang thingpui lumna turin Rs 3000 a pe bawk.

MLA hi Hrianghmun khawtlang hruaituten lo dawngsawngin thil thlen dan an lo hrilh a. Kangmei hi nimin dar 1:40pm velah Pu Khamdopaua in a tangin a chhuak a, a thenawm in pahnih Pausianliana leh Chin-eni te in kang kaiin an kang ral vek a. Kawngchhak lama Pu Liandala in kangkai lehin a kang ral leh a, inhnuaia Tractor a kang chhe tel bawk a, a thenawm Pu Kaituanga in kangkai lehin a bang sir khat leh inchhung bungrua thenkhat kang hmanin mi tlawmngai ten an thelhmit thei ta a ni. Kangmei chhuakah hian Vawk 4 kang hlumin 3 a kang hliam a, buh tin 700 vel a kang chhe tel a, a thil tihchhiat hlut lam hi Rs 38,89,250 ni a chhut a ni.

Hrianghmun khawtlang hruaitute chuan he an khawtlang chhiat tawh a theihtawpa tanpuitu Mimbung leh Teikhang khua te, Ngopa RD Block VC Association te, 2nd Assam Rifles Mimbunga mi te, Bialtu MLA, Saitual DC, Ngopa BDO leh Ngopa Police ten theihtawp an chhuahpui naah an lawmzia an lo hrilh a ni.