4106/2024-2025

Champhai, 6th February 2024: Tukin zing dar 07:30 khan CHANEM Building Ground Floor-ah Road Safety Month hawnna neih a ni a. He hun hi Pi Lalruatpuii Hnamte, DTO chuan a kaihruai a, Champhai Bawrhsap, District Level Road Safety Committee Chairman ni bawk Pu VL Remliana chuan Road Safety Month hi a hawng a ni.

Champhai Bawrhsap Pu VL Remliana chuan kumtin Road Safety Week emaw Road Safety Month hman a ni ṭhin tih sawiin a hlawhtlinna chu lirthei neitu leh khalhtu te kutah thui tak a innghat a ni, a ti a. Bawrhsap hian Road Safety Week hawnna hun hmang tura kalkhawmte chu fimkhur taka lirthei khalh ṭhin tur leh tlawmngaihna vawng nung zel turin a chah a. Lirthei khalhtute chu ram leh hnam darthlalang pawimawh an nih angin, rinawmna leh taimakna nena an hna thawk a, ṭhangthar zawk te zirtirtu ni zel turin a fuih bawk a ni. 

Pu Dennis Vanlallura, Dy. SP (Hqrs) chuan he hunah hian lirthei kaihhnawih dan hrang hrang sawifiahna hun a hmang a. Lirthei hunnaah fimkhur a ṭul a tih sawiin mahni remchanna hmunah hung mai lova, midangte ngaichang chunga lirthei hung ṭheuh tur leh lirthei khalh laia ngaihtuahna tibuai thei mobile phone hman, meizial zuk leh ruihtheihthil laka fihlim turin lirthei khalhtute chu a chah a. Motor hlui leitute chu dan in a phut hun tiam chhung ngei a hming thlakna chang hre turin a ngen bawk a ni.

Zoram Drivers Union aiawha thusawitu Pu K. Lalrinmawia  chuan lirthei khalhtute chu kawngpui hmang ve midangte ngaichang chunga motor khalh ṭhin tur leh tlawmngaihna vawng nungtu ni zel turin a ngen bawk a ni.

Road Safety Month 2025 thupui atan hian ‘Fimkhur leh him takin lirthei khalh ṭhin ang che’ tih chu hman a ni a. Hawnna hunah hian Road Safety Month pualin thutiam lak a ni bawk. 

Champhai District-a Road Safety Month hman a nih chhung hian kawngpuia veivak leh lirthei khalhtute him zawkna turin inzirtirna uar takin kalpui a ni dawn a. Zirna in hrang hrangah zirlai ten thutiam (Road Safety Pledge) an la ang a, NCC ten traffic duty te an pui bawk ang. Hei bakah hian lirthei hralhchhuaktute (Vehicle Dealers) chuan an dawr hmunhmaah Road Safety Month lam hawi inzirtirna an tar chhuak ang a. MVI, Police leh Excise ten khawng takin motor leh a khalhtute endikna (checking) an kalpui bawk ang.

Road Safety Month pual hian District Level Road Safety Committee chuan tunhnaia chetsualna thlen tamna hmun Champhai Zotlang- New Champhai kawngpui, Faith Farmhouse leh 7th Day Workshop inkarah vaukhanna (warning sign) mumal tak siam a, kawng enkawltu PWD Highway Division te hnenah speed breaker siam tura ngenna thlen a tum bawk a ni.