No.2568/2021-2022

Aizawl, 12th October, 2021: Sawrkar hmalakna leh mamawh thu thlen hriaa UNICEF in ICMR kaltlanga RT PCR khawl a rawn pek chu District Hospital Champhaia hman turin tukin khan Law & Judicial Minister Pu T.J. Lalnuntluanga, Champhai South bialtu MLA chuan District Hospital hotute kutah a hlan.

RT PCR inhlanna puala inkhawm Doctors' Lounge, District Hospital Champhaia buatsaihah Khuallian Pu T.J. Lalnuntluanga chuan District Hospital Champhaia RT PCR khawl dah tur thlen fela inhlan a ni ta chu District tana ni chhinchhiah tlak leh pawimawh tak a ni tiin, RT PCR khawl Champhaia bun a nih theihna tura Chief Minister leh Health Minister-te hmalaknaah lawmthu a sawi a. Ram pum anga Covid-19 hrileng beihna kawnga NGO, Kohhran leh khawtlang hruaituten sawrkar an tawiawm thinnaah lawmthu a sawi bawk.

A nihna tur ang taka khawl bunfel turin  khawl mai piah lamah tul leh bawhzui turte a awm nual a, mithiamte leh khawtlang hruaitute nena inrawn chunga lungrual taka hmalak tlan zel a ngai a ni, a ti a. Inrawnkhawmna leh sawihona tha tak neia District tana khawl chhawrnahawm  leh tangkai tak tur bun a nih ngei a beisei thu sawiin RT PCR khawl chu DMS leh CMO Champhaite kutah a hlan nghal a ni.

Khualzahawm Pu Ramthanmawia, MLA, Vice Chairman, Bamboo Link Road Board chuan District tana tul leh pawimawhte District MLA ten lungrual taka an buaipui thin thu sawiin, hripui leng vangin hmanraw thar leh tih dan phung tharte a awm zel a, hmasawnna peng a awm zel a ni, a ti a. District Hospital harsatna leh mamawhte bialtu MLA ten an hriatpui thu leh tihchangtlung tuma theihtawp chhuaha hma an lak mek zel thu a sawi a. Thawktute chu damlo thingtlang kilkhawr ber atanga pantute theihtawp chhuaha lo ngaihsaka enkawl zel thin turin a fuih a. RT PCR hlawhtlinna tura tha thawhtu zawng zawngte fakawm a tih thu pawh sawiin, Champhai mai ni lo zofa zawng zawng ten an hman tangkai ngei a beisei thu a sawi bawk.

He hun hi Dr. Zatluanga, DMS, District Hospital Champhai chuan kaihhruaiin Hospital dinhmun tlangpui report a pe a. Dr. Krossnunpuii, Microbiologist (MD) in Champhai District Covid dinhmun tlangpui a sawi a. Dr. R. Lianmawia, CMO Champhaiin lawmthu sawiin hun a khar a ni.

Hemi hnu hian khawl thar bunfel a nih theihna kawnga hmalakna tur leh tul angte Pu H. Lalfakawma, Sr. E.E, H&FW Department, Doctor leh NGO hruaitute an sawipui a. Khawl bun lailawkna tur atana ruat Eye Ward building leh tuna TrueNat khawl bunna leh hnathawh mekna hmun, nakin lawka RT PCR khawl bun nghehna tura ruat hmunhmate enfiah niin, hmalak dan turte sawiho a ni a. A tul angte buaipui turin H&FW Department hotute leh Engineer-te  ruat an ni a. Hemi hnu hian PM CARES Fund atanga dawn minute khata Oxygen litre 500 pe chhuak thei PSA Oxygen Plant, Eye Ward building ground floor a bunfel chu an tlawh bawk.

Mizoram sawrkar hmalakna leh mamawhnate hriain ICMR/DHR chuan UNICEF kaltlangin testing centre-te tih changtlung nan a thlawna RT PCR  rawn dah theih turin kum 2020 khan UNICEF ah rawtna a thlen a. Kumin August ni 1, 2021 khan ICMR chuan UNICEF kaltlangin Champhai District Hospital-ah RT PCR khawl an dah tur thu District Hospital Champhai a rawn hriattir a ni.

September ni 25, 2021 khan UNICEF kaltlanga dawn tur RT PCR khawl 4 zinga 3 te chuan ZMC an rawn thleng a. A dawngtu tur inbel sa vek niin,  ZMC a mi tur 2 leh Lunglei District Hospital a mi tur 1 te an ni. Champhai District Hospital-a dah tur a tih fel vek tawh chu AIIMS, New Delhi-a an RT PCR khawl a kan chhiat thut avangin AIIMS ah an pe ta thung a, Champhai District Hospital atana tih vek tawh RT PCR khawl chu remruatna dang siam thut a nih tak avangin a rawn thleng ve ta lo a ni.

Hetiang a nih tak avang hian District Hospital Champhaia RT PCR khawl dah a nih theih nan District MLA te leh sawrkarin a tul angte bawhzuiin hma an la a, ZMC a dah tur zinga pakhat chu Champhaia dah turin a company Bio RAD representative-te zuk hriattir an ni a, an ni rem tihna thlapin September ni 29, 2021 khan Champhai District Bialtu MLA te chuan ZMC atangin an la chhuak a, vawiin hian District Hospital Champhaia phurh thlena hman tura hlan a ni ta a ni.

Tukin thlenga Champhai District-a Covid-19 dinhmun tlangpui report atanga a landan chu hetiang hi a ni:
1) Total cases - 4244
2) Discharged - 3357 (79.10%)
3) Deaths - 4
4) Active cases - 883

Test kalpui tawh dan tlangpui:
1) RagT - 37573 samples
2) Truenat - 7168 samples
3) RT PCR - 1476 samples
4) Mass testing - 9133 samples, positive 734 (8.03%)

District Hospital Champhai Report.
Covid Test neih dan:
1) RagT - 3808 samples
2) Truenat - 80 samples

DCHC dinhmun:
1) Khum awm zat - 28 (Paedia 5, SNCU 3)
2) Total cases - 104
3) Discharged - 85
4) Referred - 8
5) Active cases - 11
6) Deaths - 0