No.2569/2021-2022
Aizawl, the 12th October 2021: Vawiin chawhnu khan Pu Lalchamliana, Home Minister chuan DGP Conference Hall, Police Headquarters-ah Integrated Road Accident Database(iRAD) Project chu Mizorama hman atan a hawng a. iRAD Project hian Mizoram Police, Health & Family Welfare, PWD, Transport Department leh NIC te a thlun zawm a. Lirthei chesual an awmin iRAD hmang hian chetsualna a lo thlen dan leh a thlen chhan te kimchang takin hriat theih a ni dawn a. Hei hian kawngpui himna tura hmalakna tha zawk a siam dawn a ni.

iRAD Project in Mizoram hawngtu Home Minister Pu Lalchamliana chuan India ramah hian ram chhung hmasawnna tur leh khua leh tuite that zawkna tur project, programme leh schemes hrang hrang hman tura chhawpchhuah leh hman mek te leh Mizorama kalpui mek te a sawi hmasa a. Sorkarin project, scheme leh programme a neihte chu a hlawhtlinna tak tak chu a buaipuitu sorkar officialte kutah thui tak a innghat a ni a ti.

Tun dinhmunah Mizoram ah hian project thenkhat - CCTNS (Crime and Criminal Tracking Networks & Systems), 112 ERSS (Emergency Response Support System) te kalpui a ni a. Project lian dang ICJS (Inter-Operable Criminal Justice System) leh NAFIS (National Automated Fingerprint Identification System) te pawh a taka hman theih tura kalpui mek a ni a ti.

iRAD (Integrated Road Accident Database) project chu India sorkar hnuaia Ministry of Road Transport & Highways in a kalpui a ni tih a sawi a. He hmalakna hi a pawimawh hle a, Mizoram kawngpui enkawltu PWD te pawhin an chhawr tangkai dawn hle nia sawiin kawngpui te pawh tun aiin lirtheia veivak te tan a him chho dawn a ni a ti. Home Minister chuan iRAD project hman a ni ta chu lawmawm a tih thu sawiin Lirthei chetsualna thlen chhan tam zawk chu pumpelh theih leh a khalhtute fimkhur tawk loh avanga thleng a ni tih a sawi tel a. Lirtheia chuangte nunna kawltu emaw tih turin lirthei khalhtute mawhphurhna a sang a. Chuvangin lirtheia veivak te himna tur chuan lirthei khalhtute an pawimawh ber a ni tih erawh kan hriattlan a tha a ni a ti.

iRAD (Integrated Road Accident Database) project hi Mizoram ah India ram hmun thenkhat angin Dt. 15th September 2021 khan hman tan a nih tawh thu sawiin iRAD project hian India ram puma accident data dik leh rintlak neih a, chu data chu zir chian a, ram chhunga motor accident chhan leh a tih tlem dan kawngah nasa takin a puih tur thu a sawi bawk.

Home Minister chuan iRAD project a hlawhtlin theih nana theihtawp chhuahtu - Police, Transport, Public Works leh Health department-te bakah training petu NIC officer leh staff-te fakin he Project hi a hlawhtlin zel theih nan thawktu te theihtawp chhuah zel turin a chah bawk a ni.

iRAD hawnna a report pek dan chuan iRAD hman tan Dt. 15th September 2021 atanga vawiin thlenga Mizoram chhungah road accident case 17 (sawm pasarih) iRAD app ah ziahluh tawh a ni.

iRAD hawnna hun hi Pu John Neihlaia, IGP(Headquarters) chuan a kaihruai a. He hunah hian Mizoram sawrkar hnuaia Department hrang hrang — Police, Transport Department, PWD, Health Department te bakah NIC Mizoram atangin senior officer te an tel a. Er.R.Lalrammawia, Director, Transport Department leh Er.H.Zoramliana, S,E,(Planning), E in C office,PWD ten thu an sawi a, Pu R.A.Sanjeev, IGP(Law & Order) in lawmthu sawiin he hun hi khar a ni.