2224/2023-2024

Champhai the 9th October, 2023 – India ram puma kum tin October ni 5 atanga ni 12 chhunga hman thin Right to Information (RTI) Week chu vawiin chawhnu khan Champhai District tan DC Conference Hall, Keifangtlang-ah hman a ni a. Champhai DC Pu James Lalrinchhana chu khuallian a ni.

He hunah hian Champhai District Head of office te, SPIO leh SAPIO, Champhai MJA hotute, Champhai Sub Hqrs MHIP, YMA leh MUP hruaitute an tel a ni.

Champhai DC & District Appellate Authority Pu James Lalrinchanna chuan mipuite rorelna sawrkar (Democracy) leh RTI chu thil kal kawp tlat a ni tiin Sawrkar hmalakna leh hnathawhte hriat chu khua leh tui te chanvo a ni, a ti a. He Dan hi anih tur ang nei hman tangkai anih theihnan RTI hnuaia mawhphurna fawng chelhtu SPIO leh SAPIO-te chu he Dan hi lo in zirchianga, a hun bituk chhung ngeia information pe chhuak thin turin a chah a. RTI chu India khua leh tui zawng zawngte tana dikna chanvo pawimawh berte zing ami ani tih hre thar leh turin kalkhawmte chu chahin, mipui puih duhna rilru pu tlat chunga RTI zawhna te uluk taka chhang thin turin a chah a. He Dan hnuai chetlak dan tur chungchangah hriattiam loh leh hriatchina duh an neihte chu District administration-ah emaw Mizoram Information Commission lamah inthlahrung lova zawtfiah thin turin a chah a. Mipuiten sawrkar atanga an hriat duh apiang an hriat theihna hmanrua RTI hi langtlang sawrkar siamna tura thil pawimawh, sawrkar khalh ngiltu leh sawrkar tha siamtu hmanraw tangkai tak a nih avangin Champhai District mipuite chu RTI hmang uar deuh deuh turin a chah a ni.

RTI Week hi October 5- October 12, 2023 chhungin India ram pumah hman a ni a. A lawmna pui ber chu Aizawlah neih niin District Headquarters tinah he hapta chhung hian RTI Act pualin hun an hmang vek dawn a ni.

Vawiin program hi Champhai Additional DC Pu M. Misael in a kaihruai a. Pi C. Lalremruati, Champhai DIPRO & Master Trainer on RTI Act chuan RTI chungchanga mipuite leh public authorities hrang hrangte hriattur pawimawhte leh Mizorama RTI kalpui dan leh dinhmun tlangpuite zirtirna a nei a. Zawhna leh chhanna leh sawihona hun tha tak hman ho niin, Pu Lalrinawma Khiangte, Champhai SDO(S) chuan lawmthu sawina hun a hmang a ni.

RTI Act hi India ramah October ni 12, 2005 atanga hman tan a lo ni ta ni. Mizoram ah chuan June ni 29, 2006 ah Mizoram Information Commission chu din a ni a, July ni 5, 2006 atangin hna a thawk tan ve a ni. Mizoram RTI Online - rti.mizoram.gov.in/ hi July ni 1, 2022 khan hawn a ni bawk. Information dil theitu te chu India khua leh tui zawng zawng an ni a, Information dil man hi Rs 10/- niin BPL ten BPL chungchang hriatfiah duh an neihte dil man chawi a ngai lo a ni.