Vawiin khan GM Higher Secondary School Champhaiah Rualbanlote dikna chanvo leh hamthatna neih dan zirhona Dr Lalnunthara,Commissioner, Persons with Disabilities, Govt. of Mizoram hova neih a ni.

Dr. Lalnunthara  chuan thusawiin RPwd Act, 2016 hman anih hnuah rualbanlo chi hrang hrang hrang 7 ni thin chu 21-ah tihpun a nih thu te, kum 2011 Census a tarlan anih danin Mizoram-ah rualbanlo mi 15,160 awmin an zingah hian mipa 8,198 leh hmeichhia 6,962 an awm tih a sawi a. RPwd Act, 2016 hnuaia hmalakna hrang hrangte tarlangin, Sawrkar Department hnuaia rualbanlo hnathawkten an harsatna leh lungawi lohna an thlenna tur Grievance Redressal Officers ruat an nih tawh thu te, rualbanloten Sawrkar hna an hmuh ve theihna turin Reservation buatsaih anih thu te a sawi a. Heng bakah hian rualbanlote tan zirna in sang zawkah te, Agriculture ram leh in hmun theh chungchangah te, Development Programme hrang hrang leh retheihna umbona, Poverty Alleviation chungchangah te hamthatna siamsak a nih dan te a sawi lang bawk.

Mizoram a The Rights of Persons with Disabilities Act, 2016 hman anih hnuah pianphung a rualban lo mi 60 velin hna an hmu tawh thu leh he Danin a phut angin rualbanloten an dikna leh chanvo hrang hrang an neih theihna tura Committee siam ngai te pawh Mizoram Sawrkarin in a siam tawh thu tarlangin Rualbanlote tan sawrkar hna 4% resuerve sak an nih thu te, Zirna sang ah 5% seat rualbanlote tana hauhsak an nih thu te leh kum lamah pawh kum 5 ngaihhnathiam tur an nih thu a tarlang bawk.

Dr. Lalnunthara chuan Zirna Inah rualbanlo an nih avangin tumah en hran tur an nih loh thu te, infiamna leh intihhlimna kawngah pawh an tlin tawk anga ngaihtuahpui tur an nih thu te a tarlang bawk a. Hriatna tha lo sawrkar hnathawkte tan Damdawi Ina awm kher ngai lovin an mamawh beng dar te dan angin an thlakin an reimburse theih tawh tur thu  a tarlang bawk.

He hun hi Pu K. Pazawna GM Higher secondary School Principal chuan a kaihruai a ni.