Vawiin chawhnu khan Health & Family Welfare Minister Dr. R. Lalthangliana’n Mizoram Government Doctors’ Association (MGDA) leh Indian Medical Association (IMA) Mizoram Chapter hruaitute a pisa ah  kawmin HIV dinhmun leh a chungchang a sawipui.

Health Minister Dr. R. Lalthangliana chuan HIV chungchanga Mizoram dinhmun a vei hle tih sawiin a dona kawngah theihtawp kan chhuah chungin, a sang lam kan pan zel a, a tlakhniam theih nan engtin nge Kohhran, pawl, sawrkar, doctor leh hemi kawnga thawkte nen hma kan lak tlan theih ang tih chu a rilruah a lian hle a ni, a ti a. Tunah hetiang dinhmun a kan dinchhan hi thuk taka zir tlan a, kalphung leh tihdan neih mek, awmze nei lo nia lang te thlak a, ngaihtuahna thar nen HIV  hi kan do tlan a tul nia a hriat thu a sawi a. Meeting a kal te chu zau takin, an ngaihdan te, an rawtna te leh an ngaihtuahna te sawi chhuak tura sawmin meeting chuan rah tha a chhuah ngei a beisei tih a sawi bawk.

Meeting ah hian MGDA leh IMA hruaitute  chuan tlang takin he thila an ngaihdan leh HIV dona kawnga hlawhtlinna fum fe a awm loh chhan leh a tlakhniam theih loh chhan ni a an hriat leh an ngaihdan te an sawi a. HIV in Mizoram society a chiah hneh tle tih chu hairual a ni lo a, tuna kan hmalakna leh kal mek danah ringawt hi chuan kan dinhmun hi a tlakhniam mai rin a har thu te leh ngaihtuahna thar nena a dona hi kalpui a tul tih chu meeting ah sawi lan a ni.

Meeting ah kalte thu leh hla a ngaihthlak hnuin Health Minister chuan MGDA leh IMA hruaitute chu an rawtna leh ngaihdan te mumal taka ziaka thehlut turin a hrilh a ni.