Nimin (17.10.2019) khan New Delhi-a cham mek Dr. Vanlaltanpuia, MLA, Chairman, MYC chuan Ministry of Agricultural & Farmers Welfare hnuaia National Bee Board-te dawrin, Lunglei District chhunga Bee Keeping farm changtlung tak dinna turin inremna an siam. Dr. Vanlaltanpuia, Chairman, MYC chuan Sanjay Aggarwal, IAS, Secretary, Deptt. of Agriculture & Chairman, National Bee Board leh Dr. BL Sarswat, Executive Director, National Bee Board te kawmin hun hlawhtling tak an hmang a ni.

MYC Chairman chuan thalaiten  eizawnna tha zawk an neih theih nan te, eibar dapna hmunpui siamnan te, rural livelihood tihchangtlun a nih theih nan theihtawpa hma lak a tul tawh a ni, a ti a, hemi atan hian Lunglei District chhungah Bee Keeping farm changtlung tak ‘Centre of Excellence’ sak a ni thei tur hi a lawmawm hle a ni tiin, hei hian thalaite eizawnna tur kawng a hawnsak tur thu a sawi.

National Bee Board hotute hian Mizoramah rawn kal a, a rang thei ang bera hmalak tan a nih theih nan rang taka bawhzui an duh thu MYC Chairman hi an hrilh a ni.