Mizo Zirlai Pawl (MZP) Headquarters Champhai chuan vawiin khan kum 25 an tlin Silver Jubilee lawmna Government Champhai Multipurpose Hall-ah an lawm a. He hun hi Er. Lalrinawma Deputy Speaker, Mizoram Legislative Assembly chuan Khuallian niin a hmanpui a. Silver Jubilee puala buatsaih Souvenir a tlangzarh nghal a ni.

Khuallian Er. Lalrinawma, Deputy Speaker, Mizoram Legislative Assembly chuan MZP Headquarters Champhai in kum 25 hmel a hmua Silver Jubilee a hmang chu a lawmpui thu  sawiin, kalkhawmte Silver Jubilee pualin chibai a buk a. Zirlaite chu faina leh mahni inthununna nunpuia  an nihna leh dinhmun chiang taka hre thin tura fuihin, an hmakhua ngaia nu leh pa ten theihtawp an  chhuah thinna theihnghilh lo turin a chah a.  Chhungkua leh khawtlang nghahfak anni tih in hria a, an hmazawna tla mawhphurhnate  rinawm taka  hlen tum thin turin a fuih bawk.

Ram leh hnam chhanna kawnga pawimawh hmasa chu hnathawh hreh loh ani tiin,  Kohhran khawtlang leh sawrkarin hna a pawm chinte chu a zahawm a, eng hna pawh zahpui hauh lo a thawh chuan kan intodelh anga, ram leh hnam chhanna tha tak a ni, a ti a. Zirlaite chu pass ngawr ngawr duhtawk mai lova  thiamna tak tak nei a,  chhawrtlak leh belhtlak nih tum theuh turin a chah a. Hlawhtlinna chang tur chuan rual elna chang hria a  mahni inlum leh nawmnate kalsan hmasak ngam a ngaih thin thu sawiin,  Mizoram sawrkara fawng chelhtu lian tak takte pawh mahni inlum  kalsana chona thar hmachhawn ngamte an ni, a ti a. Nu leh pa thuawiha an thurawn lak hrehlo tura  chahin chhungten an neih phak tawk ang an pekah lawmna chang hriat a ngai a ni, a ti bawk.

Deputy Speaker chuan Zirlai kalkhawmte chu Mizoram runtu hlauhawm tak AIDS natna lak atanga inveng  fimkhur tura chahin, thalaite chu taksa zaha hlutna chang hre tur leh    Nupui pasal neih hma a invawng thianghlim hram hram turin a fuih a. AIDS natna hrang mek do leh ven hna chu department leh thawktu dangte kuta dah mai lova mahni kutah a awm ani tih hre theuh turin a chah bawk. Khuallian chuan zirlaite chu  mahni hnam leh kalphungte ngaihsanna chang hre thar leh tur a fuihin, Pathian  min pek ramah hian kan nunphungte kan chawisana zahna kan lantir fo angai a, tu ram mahin min vawnhim sak dawn lo a ni, a ti a. Chhiat  that tawh palh chang pawha Mizo khawtlanga  zonun ze mawi tak lang thin chu chhuanawm a tih thu leh thlahthlam mai lova chhawmnung zel zawk angaih thu a sawi a. MZP Headquarters Champhai ten  Silver Jubilee an thleng chu lawmpuiin an kalzelna turah duhsakna a hlan nghal a ni.

He hunah hian Pu L.Ramdinliana Renthlei President,MZP General Headquarters pawhin MZP Hqtrs Champhaiin  kum 25 a thleng chu a  lawmpui thu a sawi a.  MZP  chu  October ni 27, 1935  a din 'Tanrual hi chakna' tih thupui leh 'Mizo zirlaite kan ram leh hnam tan'  tih thuvawn a hmang thin a ni, a ti a. MZP chuan  Zofate inpumkhatna a ngaipawimawh em em a, tawng avanga unau hmel hai ani thin chu MZP in pawi a tih thu leh thisen vanga unau kan ni tih inhre thar leh turin kalkhawmte a chah a ni.

Vawiin Silver Jubilee lawmna hun hi  Pu Lalrammawia Tlau, Vice President, MZP Hqtrs Champhai chuan a kaihruai a. Secretary Pu  Lalthanfela'n  inhmelhriattirna neiin report a pe a. Pu Lalramnghetzuala, Jt Secretary & Editor Souvenir Editorial Board-in Souvenir tlangzarh buaipuiin, Pu H.Lalramhluna President MZP Hqtrs Champhai leh Pu Liantluanga Renthlei, Ex-President, MZP Hqtrs Champhai te hnen atangin thusawi ngaihthlak a ni a. Pu Thangdeihmanga, Treasurer in lawmthu sawiin hun a khar a ni. Chawhnu lamah Silver Jubilee lawmna pualin Concert leh Cultural Show te buatsaih a ni.

Tukin zing khan Silver Jubilee puala lung phun chu Deputy Speaker hian MZP Pisa,CHANEM Building-ah a lo hawng tawh bawk a ni. Mizo Zirlai Pawl (MZP) Hqtrs Champhai hi kum 1994 a din  niin, Headquarters hnuaiah hian
tun dinhmunah Sub-Hqtrs 5 leh Branch 11 an awm mek a ni.