No.1127/2021-2022
Dated Champhai, the 25th June, 2021: Vawiin khan Champhai District Bawrhsap Pi Maria C.T Zuali, Chairman, District Disaster Management Authority (DDMA) Champhai hovin District chhunga sawrkar sikul zirlai inziakluh awm zat leh sikul kal theih dan tur chungchangte relin DC Conference Hall-ah thutkhawm a ni.

Pi Maria C.T Zuali chuan Covid-19 hrileng vanga hun rei tak sikul khar a nih tawh thu sawiin, sikul leh a chhehvelte uluk taka vawnhim a tul thu leh sawrkar sikulte zirlai tam zawk hip thei tura tanlak a tul thu a sawi a. Hrileng laka him theih nan Champhai District lut chhuakte uluk taka vil reng a nih thu leh, inkhuahkhirh that avangin tundinhmunah hrileng a ziaawm rih thu a sawi a. Sawrkar hnathawkten sawrkar rawih an nih anga mawhphurhna leh tih tur bitukte tha taka an hlen a ngaih thu pawh sawiin, zirtirtute chu sikul naupangte hmasawnna tur ngaihtuah chung zela theihtawp chhuah turin a chah a. Nakin lawka ram leh hnam inghahna tur khawp mipuitling, mahni kut ke a dinga intodelh thei chherchhuah kawngah tanlak a ngai hle a ni tiin, hun tawn dan ang zela inherdanglam thiam a tul thu a sawi bawk.

DDMA Champhai thukhawm chuan Covid-19 hrileng vanga online class kalpui thin chu District chhung khaw thenkhatah inbiakpawhna internet a awm loh/mumal loh avang leh, smartphone neih remchan loh avanga harsatna awm thinte ngun taka a ngaihtuah hnuah, Champhai khawpui pawn hrileng laka fihlim leh himahte Covid-19 laka him tlanna tur inkaihhruaina sawrkarin a duante zawm chung zela sikul kal a nih theih dan tur ruahman tha a ti a, Champhai khawpui sikulte erawh hrileng awm dante thlir chungin huapzau zawka inrawnkhawmna neih nise tih a ni a. School Education Department Champhai hotute chu sikul hrang hrangte zirlai neih dan, zirtirtu awm dante mumal taka zirchianga Covid-19 inkaihhruaina bawhchhe lova sikul hawn a nih theih nana ruahmanna mumal tak siama DC Office-a thehlut tura tih an ni.

He hunah hian zirna kawnga Champhai District sikul hrang hrangte dinhmun leh zirlai neih dante zirchiana sawiho a ni a. Covid-19 hrileng vanga hun rei tak sikul kai tawh loh chungchangte sawiho niin, DDMA Member, School Education Department hotute leh Health Department hotute atangin ngaihdante thawha sawiho a ni a. Covid-19 hrileng mek laka District dinhmun tlangpui thlirho niin, tun dinhmunah hrikaite chu state pawn atanga lokal khunghrante an nih tlangpui thu leh, tun ang zela fimkhur taka kal a nih chuan sawkarin inkaihhruaina a duante zawm chungin District hmun thenkhat, Champhai khawpui pawn  Covid-19 hri laka fihlim khuaah inkhuahkhirhna kengkawh chunga sikul hawn a him thute pawh sawiho a ni. He hunah hian Champhai District tana a thlawna zirlaibu sem tur ngai zat za zela 60 (60%) dawn a nih tawh thu leh tun thla chhungin  dawn bak dangte dawn hman beisei a nih thute pawh tarlan a ni bawk.

School Education Department report danin June ni 23, 2021 thleng khan Champhai District chhunga Sawrkar enkawl Primary School 76 ah zirlai 4,083, Middle School 69 ah 3,586, High School 42 ah 2,080 leh Higher Secondary School 2 ah zirlai 743 te an awm a ni.