3631/2022-2023
Champhai, the 20th February, 2023: Mizoram hmun dangte rualin State puitlinga hlankai kan nih ni, State Day vawi 37-na, State Day 2023 lawmna chu vawiin chawhma dar 10 khan I&PR Auditorium Champhaiah District Bawrhsap Pu James Lalrinchhana hova hman a ni.

District Bawrhsap Pu James Lalrinchhana chuan District mipuite State Day puala chibai bukin, State Day lawmna chuan State puitling ni tura tobulte mipuiteah hriat thar tir leh se a duh thu a sawi a. State dinhmuna Mizoram hlankai a nih hmaa inrelbawlna kawnga hmalakna hrang hrangte tarlangin, thuthlung ropui tak Mizoram Peace Accord ziah kaltlangin State puitlinga hlankai kan lo ni ta a, hemi hnuaiah hian India danpui siamthatna 53rd Constitutional Amendment kaltlangin Article 371G zehtel a ni a, hei hian a bik taka inhungbikna min siam a ni, a ti bawk.

Bawrhsap chuan State nih atanga kum 37-na hmel Mizoramin a hmu thei chu lawmawm tiin, State dinhmun nihna hlu tak vawngnunga humhim zel tur hian rilru puitling tak nei chungin thiamna leh finna kawngah rualelna dik kan neih a pawimawh hle a ni, a ti a. NGO, Political party, Kohhran, Media leh pawl hrang hrangte chu mahni huang chhung theuhah ram hmangaihna dik tak thinlung pu tlat tur leh, remna ti chhe thei thilte do tlan puiah a sawm a. Mizoram State puitlinga hlankai a nih hnua boruak muanawm tak hnuaia inthlanna felfai tak State naupang te ni siin a nei thin chu fakawm tiin, hei hi MPF, NGO, Kohhran leh pawl dangte hmalakna rah a ni, a ti a. Remna leh muanna vawnnun zel a pawimawh thu sawiin, Pathian min pek kan ram enkawl zui zel hna hi kan kutah a awm tlat avangin theihtawp kan chhuah tlan a tul a ni, a ti bawk a. Hun tawn mek leh mawhphurhna theuhah thangtharte thil tha hnutchhiah thei tura phak tawk ang zela theihtawp chhuah a pawimawh thu pawh sawiin, kalkhawmte chu ram leh hnam hmasawn zel nan leh chawisan kawnga theihtawp chhuah puiah a sawm a ni.

Thusawitu dang Pu Lalsanglura Zote, President, MNF Champhai South Block chuan Mizoram chu State puitlinga hlankai mai bakah hamthatna dangte pek tel a nih thu a sawi a. Rambuai atanga remna leh muanna a awm theih nana hmalatu leh tha thawhtu zawng zawngte fakawm a tih thu sawiin, State nihna dinhmun neia lawm mai piah lamah, thlen chin atangin thahnemngaihna nen hmasawn tuma ngaihtuahna thar sen zel a pawimawh thu a sawi bawk.

He hun hi Pi R.Lalnunkimi, DUDO/DTO Champhai chuan kaihruaiin Dr. R. Lianmawia, CMO Champhai chuan hunserh a hmang a. Pu Vanlalchhuanliana, BDO/SO Champhai chuan kalkhawmte lawmna thu a sawi a ni.

State Day 2023 lawmna hunah hian Champhai khawpui chhunga Head of Office-te, Political Party leh NGO hrang hrang hruaitute an tel a ni.