3630/2022-2023
Aizawl, the 19thFebruary 2023 : Vawiin chawhma khan Union Minister of State for Communications Shri Devusinh Chauhan chuan Chief Secretary Conference Hall, MINECO ah Department of Telecommunications, Department of Posts leh BSNL hotute chu Mizoram chhunga mipui tana an hnathawh leh rawngbawlna te thlirpuiin Review meeting a neihpui.

Pu Devusinh Chauhan chuan mipui rawngbawlna kawngah tunlai thiamna thar hman chhoh zel a pawimawh thu sawiin Mizoram ang state, agriculture leh thil dehchhuahna tam lohna hmunah ICT in dinhmun pawimawh tak a luah mek avanga ICT service te chu thalai leh thangtharten eizawnna kawng hrang hranga an hman tangkai theih nan tun aia tha zawka kan duan leh siam a pawimawh a ni tiin hemi kawngah hian DoT leh BSNL te chu tan la leh zual turin a chah a ni. Post Office chungchang sawiin Post Office hian mipuiin an huam zau viau avangin an hnuaia bank India Posts Payment Bank chuan mipui a thlen zau zawk nan hemi kawngah tan lak ngai nia a hmuh thu a sawi.

Meeting ah hian Department of Telecommunications, Department of Posts leh BSNL hotute leh aiawhte chuan a hran theuhin power point presentation hmangin Mizorama an dinhmun tlangpuite, an hnathawh leh mipui tana service hrang hrang an pekte leh hengte hi tha zawka an ruahman chhoh mek dante, sum an thawh chhuah dante, an hmachhawp te leh an harsatna te an tarlang a. Meeting ah hian Central Assistance to States for Capital Expenditure hnuaia Mizorama District khawpuite leh Block khuate tha zawka internet connectivity inthlunzawmna tur project cheng vaibelchhe 50 hu ICT Department kaltlanga ruahman chhoh mek pawh DoT hotuten an sawilang a ni.

Mizoramah Head Post Office 1, Sub Postal Division 4 leh Post Office leh Branch Post Office 387 a awm mek a. DoP tarlan danin Assam tiam lovin Hmarchhak state hrang hranga khaikhinnaah Mizoram a Post Office te chuan sum an thawk chhuak tha nia sawi a ni. DoT tarlan danin Mizorama khaw awm zawng 877 atangin khaw 724 chu mobile service leh a kaihhnawih ten an tuam tawh a. BSNL in 4G Saturation Project kaltlangin khua leh hmun 181 (24 army outpost te tiamin) 4 G service pek theihna an ruahman mek a, heng zinga khua leh hmun 63 te chu mobile service ala thlen miah lohna hmunte an ni.