3629/2022-2023

Aizawl the 18th February, 2023 : Mizoram lo tlawh mek Union Minister of State for Communication Pu Devusinh Chauhan hovin vawiin khan Mizoram ICT Minister Pu Robert Romawia Royte, Mizoram Chief Secretary Dr. Renu Sharma, Special Secretary ICT Pu S. M. Ali leh ICT officials dangten CS Conference Hall, MINECO ah meeting an nei.

Vawiina meeting kaihruaitu Mizoram Chief Secretary Dr. Renu Sharma chuan Union MoS leh amah tawiawmtute lawmna thu sawi hmasain, Mizoram ICT hmasawnna turin Special Assistance to States for Capital Investment (SASCI) hnuaiah tanpuina Ministry lamin an rawn pek avangin lawmthu a sawi bawk.

Union Minister of State for Communication Pu Devusinh Chauhan chuan thu sawiin nimin lama Serchhip a tlawhna chungchangte a sawilang a, Mizoram-in kawng hang hrangah chak zawka hma a sawn theih nan chuan e-connectivity tihchangtlun a pawimawh hle dawn a ni a ti. Prime Minister Pu Narendra Modi-in India hmarchhak bial hmasawnna tur a ngaih pawimawh em avangin Union Minister te chu thla tin North East State engemaw ber tlawh tura a chah theuh angin Mizoram State rawn tlawh chu a duh tak thu a sawi a. Inkalpawhtawnna leh inbiakpawhtawnna te (communication & e-connectivity) a thatna apiangah hmasawnna hna chak zawkin a kal thei a, Mizoram anga tlangram leh kawngpui tha siam awlsam lohna hmun angah te hlei hlei e-connectivity a tangkai zual thei a ni a ti. Central Scheme tam tak he state-ah pawh kalpui mek a ni a, hengte pawh hi e-connectivity tha neih hmasak loh chuan hnathawh that a har dawn a, thingtlang khua engmawzat chu e-connectivity-in a la thlen phak loh avangin engemaw chen chu Scheme kalpui tum mahse a thlen tur dik tak, a tangkaipui tur dik tak mipuiten an chhawr thei lo thin a ni a ti. Thingtlang lam khaw tam zawkah Bank leh Insurance lam an awm mang lova, hengte pawh hi e-connectivity chak loh vang a ni tiin Union MoS chuan Mizoram harsatnate hre reng chunga hmalak dan tur ruahmanna leh hmachhawp (proposal) te an rawn thehluh leh hunah pawh uluk leh zual turin ICT officials te a chah a, sorkar laipui lamah theihtawp a lo chhuahpui zel ang tiin a hrilh bawk. 

Mizoram ICT Minister Pu Robert Romawia Royte pawhin thu sawiin Sorkar Laipui atanga Communication Minister Mizoram rawn tlawhtu hmasa ber leh e-connectivity lamah Mizoram hmasawnna a tak taka duhtu Union Minister a nih avangin lawmthu a hrilh a. Mizoram chu tlangram a nih vanga harsatna hrang hrang awm theite sawiin Pu Robert Romawia Royte chuan heng harsatna karah pawh Central Scheme te chu Mizoram Sorkarin theihtawp chhuahin mipuiten an chhawr phak turin a kalpui mek zel a ni a ti. ICT Minister Pu Robert Romawia chuan e-connectivity ti hmasawn tur chuan service provider hrang hrang – heng BSNL, Airtel, Jio leh a dangte inkarah thawhhona (coordination) tha zawk neih a ngai a, hemi kawngah pawh theihtawp chhuah angaih thu a hrilh a. Minister chuan SASCI hnuaia project hrang hrangte chu hunbi nei (time bound) a nih avangin State ICT Official-te pawhin a hun takah project-te zawhfel a nih theih nan nasa lehzuala hna thawk turin a fuih nghal bawk. 

Mizoram Special Secretary ICT Pu S. M. Ali chuan power presentation hmangin Union MoS chu ICT lamah Mizoram tun dinhmun a hrilhfiah a;  Dr. Lalthlamuana, CIO, ICT Department chuan lawmthu sawiin meeting hi a khar a ni. 

Vawiina Union MoS for Communication Sh. Devusinh Chauhan rawn tawiawmtute chu Pu Gaurav Saini, Asst. Director General, MoSC Office, GoI leh Pu Jayesh Raval, Addl P.S. to MoSC, GoI te an ni.

Attachment

  • Loading attachment...