3628/2022-2023

Lunglei 18th February, 2023: NEC sum cheng nuai 1403.40 senga sak tur Lunglei Market & Trade Centre Lungphum chu Commerce & Industries Minister Dr. R. Lalthangliana chuan vawiin khan a phum.

Lungphumna inkhawm Lunglei Bazarpui tuala neih hi Commerce & Industries  Additional Secretary Pu K. Lalhmingliana’n a kaihruai a, khuallian Dr. R. Lalthangliana chuan thu sawiin Lungleiin sumdawnna hmun tha zawk an nei thei tur chu lawmawm a tih thu sawiin ram dang nena insumdawn tawnna kawngah pawh theihtawp an chhuah mek tih a sawi a, Indo-Bangladesh Border trade pawh a hmunah ngei kalin Bangladesh lam sawrkar hotute nen pawh sawi hona an nei tawh tih sawiin he insumdawn tawnna atan hian Central sawrkara Commerce Ministry ah DPR cheng Vbc 550 thehluh fel tawh a nih thu a sawi a ni.

Lunglei District-a hmasawnna hna leh ruhrel ruahman mek chungchang pawh sawiin Dr R. Lalthangliana chuan Lungleiah Geology & Mining Regional office, mi 15 thawhna tur hawn tum anih thu te, Integrated Laboratory, Civil Hospital Lunglei pawh peih fel tep anih thu te, naupang damlo na enkawlna (Pediatric ICU) ruahman mek anih thu te leh Tawipui PHC building pawh hawn theiha peih fel anih tawh thu a sawi a ni. Lunglei Market & Trade Centre ruahman tur leh ruhrel dang ruahman te chu khawtlang mipuite leh a veng neitu VC leh YMA ten neitu chan changa uluk taka lo vilpuia lo enkawl pui turin a chah a.

Minister chuan vawiina Lungphum tak Lunglei Market & Trade Centre chu khawpui ti ropuitu a nih dawn bakah a nih dawn avangin a chhiat a thatah mipui ten mawh kan phur a ni tih hriat a tul thu a sawi bawk a ni.

Vawiina Lungphum tak Lunglei Market & Trade Centre sak that tur hi Mizoram PWD ten report a an tarlan danin Contractor hi Lalzothanga Maubawk, Aizawl a ni a, chhawng li a sak tur niin 25.08.2024 a zawh hman tura ruahman a ni. Lunglei Market & Trade Centre ah hian a zavaiin stall 339, motor 30 lenna car parking, 2 wheeler 71 lenna parking, police beat post, market office, toilet 34 te bakah godown, bawlhhlawh dah khawmna leh adt awm tura ruahman a ni.

Lunglei Market & Trade Centre Lungphum phumna inkhawmah hian HPC Vice Chairman Pu Lawmawma Tochhawng leh Pi Lalrodingi, Director, Tourism & Industries, NEC te pawhin thu an sawi a. Pu Lawmawma Tochhawng chuan Lunglei District mipuiten kan awh leh kan mamawh em em, chhungkaw tam tak tana eizawnna hmunpui ni tur Lunglei Market & Trade Centre chu District pum tana ro tling a ni tiin contractor leh Implementing Department te pawh a sak hna uluk leh tha taka ti ruin a chah a ni.

Pi Lalrodingi, Director, Tourism & Industries, NEC chuan he project hi nikum chhunga NEC in project an sanction zingah a len ber thu a tarlang a. VEC hnuaiah hmarchhak state thalaite tan training tha tak tak buatsaih anih thin thu sawiin Mizo thalai te chu NEC hmalakna hrang hrangte hmang tangkai ve tur leh NEC website-a thil pawimawh tarlante lo ngaihven ve thin turin a chah a ni.