No.2602/2021-2022
Aizawl 14th October, 2021: Mipuite hnena election kaihhnawih hrang hrangte zau zawka zirtirna Systematic Voters' Education and Electoral Participation (SVEEP) kaltlangin vawiin khan Govt. G.M High School, Champhaiah High School Zirlaite pualin lem inziahsiak District Election Office chuan a huaihawt a, thupui atan 'My vote My right' tih chu hman a ni.

Zirlaite hnena election chungchang inhrilhhriatna tura duan SVEEP Painting Competition tan hma inkhawm tawi buatsaihah Pu Lalnunfela Chawngthu, Election Officer chuan nakin lawka vote thlak rual ni tur leh vote nei mai turte chu kum 18 an tlin veleh voter's ID nei tura a tul angte buaipui turin a chah a. Inthlang ram leh mipui siam sawkar lalna rama awm kan nih avangin vote nei tawh phawt te chuan mahni chhia leh tha hriatna fim tak hmanga vote thlak hi kan dikna, chanvo leh mawhphurhna a ni, a ti bawk.

Electoral Roll-a inziahluh leh vote thlak chu khua leh tuite tihtur a nih thu tarlangin, khua leh tui dik tak kum 18 tlingte chu roll-a luh vek tum tur a ni a, dik taka roll-a inziahluh a nih theih nan leh nakin zela a awlsam zawk nan certificate leh document pawimawh hrang hrangahte hming, pian kum leh tul dangte inang thlapa ziah thin tur a ni, a ti a. Kan vote neih hi kan dikna leh chanvo a ni tih thupui hmanga lemziahsiak tel turte duhsakna a hlan nghal bawk.

Pu Lalhriatrenga Khiangte, LDC, Election Office, Champhaiin painting competition thupui awmzia leh intihsiakna kalpui dante a sawifiah hnuah lemziahsiak bul tan a ni.

Vawiin My Vote, My Right tih thupui hmanga lem inziahsiakah hian High School Zirlai 16 an tel a. C.Lalrintluanga, Class IX, Pine Hill Adventist Academy chu pakhatna niin pawisafai Rs. 5,000/- leh thuziak cheimawi a dawng a. Pahnihna dinhmun hauhtu Lalchhanchhuaha, Class X, BC Lalthlamuana English Academy chuan pawisafai Rs. 3,000/- leh thuziak cheimawi a dawnga, pathumna Joseph Kamngaihliana, Class X, Holy Cross School chuan pawisafai Rs. 1,000/- leh thuziak cheimawi a dawng a. Heng bakah hian intihsiaknaa tel dangte pawh lawmman pek vek an ni.

Lawmmante hi Dr. Lallawmkima DIPRO leh Pu HT. Vanlalsawma, Headmaster, Govt. G.M High School ten an hlan a ni.