No.2603/2021-2022
Aizawl 14th October, 2021: Vawiin khan Land Revenue and Settlement (LR&S) Minister Pu Lalruatkima chuan District thar pathum - Khawzawl, Hnahthial leh Saitual DC te leh Settlement Officer te ko khawmin LR&S Directorate, Aizawlah an District theuha Revenue Office tihchangtlun dan tur a sawipui.

Pu Lalruatkima chuan Revenue Department chu mipui hne renga hnathawk, tuk tin mamawhtu leh pantu ngah em em an ni a, hmasawnna hna reng reng leilunga innghat (land based) a nih bawk si avangin Sawrkar leh mipui mamawhna a sang a. Chuvangin, District tharah pawh changtlung leh mumal zawka an kal a tul hle, tih a sawi a. Hripui lengin a nghawng sum leh pai harsatna avangin sawrkar hna lak a harsa em em a, thawktu indaihlohna nasa hle mahse mipui mamawh phuhru tura insanmar lehzuala, tihdan kawng zawn hram a tul a ni, Revenue Minister chuan a ti.

Vawiin thutkhawmah hian District thar pathumah Assistant Survey Director (ADS) an la neih loh avang leh dah mai tur an awm loh avangin ruahmanna siam ni se, an ti a. Saitual chu Aizawl ADS in a vil anga, Khawzawl chu Champhai ADS-in a vil thung ang a, Hnahthial chu Lunglei ADS in vil se tiin ruahmanna siam a ni. Thawktu thar indah theih loh vanga District thar pathumin In leh huan pass technical checking-a harsatna an tawh mek chu hun engemawchen atan hei hian a sukiang thei rih tura beisei a ni.

District thar pathuma Revenue Office-ah clerical staff indaihlohna nasa tak chungchang pawh sawiho niin staff mamawh zualpui pahnih khat DC ruahmannaa dah lailawk turin ngen an ni a. Office building chungchangah sawrkar ruahmanna dinglai angin Revenue Office chu DC tin ten Mini Secretariat building an sak turah an khung tel dawn a ni. Sawrkarin hriattirna a lo chhuah tawh behchhanin Land Committee din lohna khuaah din ngei ni se, tih a ni bawk.

Vawiin meeting ah hian District pathum DC leh an aiawhte bakah LR&S Secretary Pu R.Zarzosanga leh Department mi pawimawh dangte an tel a ni.