2075/2023-2024

Champhai the 29th September, 2023 - MLA General Election, 2023 neih tur pualin vawiin khan Gov't GM Higher Secondary School Champhaiah ah SVEEP Campaign buatsaih a ni a, Pu James Lalrinchhana, District Bawrhsap chuan khuallian niin a hmanpui.

‘Systematic Voters’ Education and Electoral Participation (SVEEP)’ hi Election Commission of India (ECI) hnuaia Flagship Program pawimawh tak niin, election kaihhnawih thil pawimawhte mipui zirtirna leh vote thlak pawimawh zia inzirtirna kawnga hmalakna a ni.

Champhai DC & District Election Officer Pu James Lalrinchhhana chuan thusawiin, inthlanpui lo awm tur puala vote thlak dan tur inzirtirna hun tha tak an hmang thei chu lawmawm a tih thu a sawi a. Democracy hlut zia ngaihtuah a tul tih sawiin Ram thenkhat buaina chhan bul ber chu Democracy ram an nih loh vang a nih thu a sawi. Vote thlak ngaihsak lo tam tak an awm thin chu thil pawi tak a nih thu a sawi a, kum 18 tling tawh phawt chuan vote an neih ngei ngei a ngai tih sawiin kum 18 hnu lamah chuan Vote neih a har tawh thin tih a sawi a, puitling nih hnuah phei chuan Vote nei turin beih fe a ngai tawh tih a sawi bawk.

Khuallian chuan inthlan lo awm turah chuan Vote thlak theuh turin Champhai District mipuite a sawm a, zirlai te pawh vote thlak hunah chuan mahni khaw lama haw a ngai a nih pawhin vote thlak tura haw hram turin a ngen a, zirtirtute pawhin he hun pawimawh bikah hian an zirlai khaw dang leh thingtlang zawk atanga lo kal te haw tir phalsak turin a ngen nghal bawk. Vote nei thei tawh, vote la nei si lote vote nei tura hmalak a hun tih a sawi a, inthlanpui lo awm turah hian zirlai te chu vote thlak ngei ngei turin a chah a, an awmna hmun theuha hrilh darh zel turin a sawm bawk.

He hun hi Govt. GM Higher Secondary School Champhaiah hman niin Pu Benjamin Zalawma Ralte, Election Officer chuan a kaihruai a, Dr. Vanlalnunpuii Ralte, SDC Champhai District SVEEP Nodal Officer hnen atang Election kaihhnawiha voter te hriat tur tul pawimawh hrang hrang ngaihthlak a ni a, Election Quiz neih a nih bakah Zirlaite hian EVM hmangin vote thlak dan a takin an zir bawk a ni.