2076/2023-2024

2023 Mimkut thla ni 29: Mizoram Home Minister Pu Lalchamliana chuan vawiin khan Kolasib District chhung Vairengteah 1st India Reserve Battalion Company Advance Headquarters thar a hawng.

Home Minister hian Vairengte IOC Venga 1st IR Bn Company Advance Headquarters hmuna a hawnna lungphun khuhna puanzar pawt hawngin, Company Advance Headquarters building hrang hrang leh a hmunhma a fang kual nghal a. Home Minister hi a nupui Pi Nuchhungi; Serlui bialtu MLA, Rubber & Allied Crops Development Board Vice Chairman Pu Lalrinsanga Ralte leh a nupui Pi Lalhminghlui; Inspector General of Police (Headquarters) Pu Lalbiakthanga Khiangte; Kolasib District Sr Superintendent of Police Pu Lalrinawma Traite leh 1st IR Bn Commandant Pu Vanlalnghenga te bakah, official leh political party hruaitute'n an ṭawiawm a ni.

Vairengte Multipurpose Hall-a 1st IR Bn Company Advance Headquarters hawnna puala inkhawm tawi buatsaihah Home Minister Pu Lalchamliana chuan Serlui bial chu kum 1998 - 2008 inkara a bial hlui, politics-a khaw eng hmuhtirtu bial an nih thu sawiin, an ṭawiawmna leh thawhpuinaah lawm thu a sawi a. IR Company Advance Headquarters dah thar chuan ramri hnaih, a bikin Vairengte chhehvela chengte tan thlamuanna leh ngaih ngamna a thlen ngei a beisei thu sawiin, CAH chu sipai 100 vel awmna tur a nih angin economy-ah pawh khawtlangin hma a sawnpui ngeia a rin thu a sawi a. Sawrkar leh police ringawt tan ramri venhim a theih loh va, ramri buai chungchangah Vairengte leh a chhehvel khawtlang mipui huaisenna leh inpekna a fakawm tak zet tiin, an chungah lawm thu a sawi a. Ramri buai chu chin fel mai a harsa nachungin, sawrkarin ram leh hnam tan theih tawpin hma a la reng a ni, a ti.

Home Minister chuan police thawktu indaih lohna nasa tak phuhruk tura hna lak tum a nih mek laia Mizoramin COVID-19 leh harsatna dang dang a hmachhawn avanga hna lak theih a ni ta lo chu pawi a tih thu sawiin, sum harsatna karah uniform, silai leh an mamawh hrang hrang chungchangah police te a ṭha thei ang bera thuam tura hma lakna hlawhtlinna hmuh theiha a awm erawh lawmawm a tih thu a sawi a. Police quarters indaih lohna tiziaawm turin SASCI hnuaiah khawpui huam chhunga police quarters sakna tur cheng vaibelchhe 50 hmuh a nih thu tar langin, police te hamṭhatna turin sawrkarin theih tawp a chhuah zel dawn a ni, a ti a. Ruihhlo hi ram leh hnam hmelma a ni tih hria a, zu leh damdawi hman khawlohna laka inthiar fihlim tlat turin ramria duty police te leh khawtlang ṭhalaite chu a chah nghal bawk a ni.

He huna khual zahawm, Serlui Bialtu MLA, Rubber & Allied Crops Development Board Vice Chairman Pu Lalrinsanga Ralte chuan Chief Minister leh Home Minister te kaihhruaina hnuaiah ramri chungchangah hmasawnna tam tak a awm tih sawiin, ramri buaina boruaka sawrkar hma laknaah bial mipui ai awhin lawm thu a sawi a. Ramri venhim kawnga a pawimawhzia hriaa sawrkarin Vairengtea IR Company Advance Headquarters changtlung tak a dah avangin lawm thu a sawi bawk a. Police te chu ram leh hnam tan at so a ṭul huna at so ngam tura chahin, khawtlang mipuite pawh police te ṭha taka thawhpui a, duat taka lo enkawl turin a chah a ni.

He huna thu sawitu dang, IGP (Headquarters) Pu Lalbiakthanga Khiangte chuan Vairengtea 1st IR Bn Company Advance Headquarters awm theih nana hma latu Home Minister leh Bialtu MLA te chungah lawm thu a sawi a. Vairengte khawtlang mipuite'n police te an lo dawnsawn dan leh thawhpui ṭhinnaah lawm thu a sawi bawk. Police te chu mipuite himna leh thlamuanna atana thawktu an nih angin, danin thuneihna a pek chu mahni invaivung nan ni lo, mipuite thlamuan nan hmang turin a chah a. PHQ aṭang pawhin Company Advance Headquarters tihchangtlun nan hma lak zel an tum thu sawiin, CAH-a thawkte chu mipuite thlamuanna leh venghimtu an nih theih nan duhsakna a hlan a ni.

He hun hi 1st IR Battalion, Mualvum Commandant Pu Vanlalnghenga'n kaihruaiin, Presbyterian Church of India Vairengte Chhimveng Bialtu Pastor Rev. PC Malsawmtluanga'n hunserh a hmang a. Kolasib District Sr SP Pu Lalrinawma Traite chuan inlawmna thu sawiin, PWD Project Division-II-a Sr Executive Engineer Er H. Lalnghinglova'n technical report a pe a. Zaithiamte zai ngaihthlak niin, 1st IR Bn Deputy Commandant Pu C. Lalsawta'n lawm thu sawiin hun a khar a ni.

1st IR Bn Company Advance Headquarters, Vairengte hi cheng nuai 223.71 senga din a ni a. June ni 10, 2022 khan hna ṭan niin, June ni 30, 2023-ah zawh a ni a. Sipai 30 awm theihna bahrik (30-men barrack) pathum, Sipai 10 awm theihna bahrik hun sawn theih (10-men barrack steel structure) sawm, NCO/JCO Barrack cum Arm Kote square metre 285-a zau, Type-III Quarters pahnih, Kitchen cum Dining Hall square metre 48-a zau, latrine block pathum leh sentry post pahnih a awm a ni.