2077/2023-2024
2023 Mimkut thla ni 29: Vawiin khan Kolasib Venglai Bazar Building 1st floor-ah Angel Business Promoters, National Bank for Agriculture and Rural Development (NABARD) leh Mizoram State Rural Livelihoods Mission (MzSRLM) te ṭang kawp buatsaih ni hnih awh tur ‘2-Day SHG Exhibition' chu Kolasib District Rural Development Office-a Project Director Pu Lalmuan Puia chuan Khuallian niin a hawng.
Pu Lalmuan Puia chuan India sawrkarin thingtlang nuho dinhmun chawi kan a ngai pawimawh hle tih sawiin, Self Help Group (SHG) chu thingtlang nuhote sum lak luh tihpunna tura pawl pawimawh tak a ni, a ti a. India chu ram ṭhang mek (developing country) ni mah se, thingtlang (rural) khua a la tamin, thingtlanga cheng pawh kan la ṭhahnem em em a, kan dinhmun chawi san leh dawm kan ngaihna tam tak a la awm a ni tiin, thingtlang mite khawsak chawi sanna kawngah SHG chuan a thawh hlawk hle a ni, a ti.
Pu Lalmuan Puia chuan nuho kal khawmte chu SHG anga an din hnuah thil siam kawngah te leh kawng hrang hrangah anmahniah inrin tawkna te, thathona te a pek belh ngei a rin thu te, chhungkua leh mimal anga an sum lak luh pawh a tihpun ngei a rin thu a sawi a. Hetih lai hian SHG member-te'n hmasawn an tumna kawngah sum leh pai bakah kawng hrang hranga anmahni ṭanpui tura NABARD leh Angel Business Promoters te an awm chu vanneihthlak a tih thu sawiin, anni buatsaiha exhibition neih a ni chuan SHG-te tan an thil siam hrang hrang hralh chhuahna kawngah rah duhawm tak a chhuah ngei a beisei thu leh a duhsak thu a sawi a ni.
2-Day SHG Exhibition hawnna hi Pu J. Zoramsangkima, Programme Head, Angel Business Promoters chuan a kaihruai a. NABARD aṭangin Pu JD Traite, District Development Manager (Kolasib & Mamit) pawhin NABARD-in SHG-te tana hna an thawh dan hrang hrang leh sum leh pai lama ṭanpuina an lo pek tawh dan te a sawi a. Pi Lalengmawii, Lead District Manager (Kolasib & Mamit) chuan SHG-te thawh rim rah pho chhuahna hun siam a ni chuan nasa zawkin hmasawnna lian zawk nuhote'n kan thawk thei a ni tih a tar lang a ni tiin, SHG ṭhenkhat chu loan hmanga bul ṭan te, loan la mek te an awm a rin thu sawiin, ṭha taka loan rul let tura ṭan la turin a fuih bawk a ni.
Pu Malsawmtluanga, BDO Bilkhawthlir pawhin Kerala-ah chuan SHG-te changtlung takin an kal tawh tih a sawi a. SHG nuhote chu ngaihtuahna thar leh sang zawk nei tura chahin, chumi kawngah chuan anmahni ṭanpui turin an awm reng tih a sawi a ni.
He hunah hian Thingdawl leh Bilkhawthlir RD Block chhunga SHG 16 te'n stall an siam a. He'ngah hian anmahni kutchhuak hrang hrang an pho chhuah bakah, Mizo kutchhuak dangte pawh an pho tel bawk a ni.
