2792/2023-2024

Champhai the 15^th November, 2023 – Sawrkar Laipui Ministry of Tourism hnuaia Swadesh Darshan 2.0 Scheme kaltlanga Champhai District-a tourism kawnga hmalak dan tur sawihovin vawiin khan Champhai DC Conference Hall, Keifangtlang-ah Champhai DC Pu James Lalrinchhana kaihhruaiin meeting neih a ni.

Swadesh Darshan 2.0 Scheme kaltlang hian Mizoramah Aizawl leh Champhai te tourism kawnga hmalakna atan thlanchhuah niin, he project kalpui chhung hian Champhai District-ah cheng nuai 9000 kaltlanga hmalak tum a ni a. Tun dinhmunah Tlangsam, Zotlang, Keilungliah, Vangchhia, Farkawn leh Dungtlang ah te hmalak tum a ni.

Champhai DC Pu James Lalrinchhana chuan Champhai District chu pipute sulhnu hmun pawimawh tak tak leh khualzin te hip thei tur hmun pawimawh leh mawi tam tak awmna a nin thu sawiin, heng thatna leh theihna awmte hai chhuak tur leh hmang tangkai turin Swadesh Darshan 2.0 Scheme chu tha taka kalpui ngei anih a beisei thu a sawi a. He Scheme kaltlang hian Champhai District ah eizawnna thar tam tak a awm theih tur thu sawiin he project liantham tak tih hlawhtlin ngei anih theihnan Sawrkar, NGO, khawtlang hruaitute leh District mipuite kawng hrang hranga kanlo inpuahchah lawk a tul thu a sawi a. Swadesh Darshan 2.0 chu anih tur ang ngeia tha taka hman tangkai leh tih puitlin anih theihnan Committee member-te chu theihtawp chhuah tlang turin a sawm a ni. 

Pi Zonunthari, Deputy Secretary, Tourism Department chuan Tourism hmalakna hrang hrang leh Swadesh Darshan thiltumte leh kalpui dan tur te a sawifiah a. Dr R. Lalrinchhani, Deputy Director, Tourism leh Vaibhav Bhatnagar, Project Manager, EGIS te chuan Powerpoint Presentation an nei a. Project kalpui dan tur sawiho niin, zawhna leh chhanna hunh man a ni.

Vawiin meeting-ah hian Sawrkar Department hrang hrang aiawhte, tlawmngai pawl aiawhte, Hotel Chawngthu, Aui Guest House neitute an tel a ni.