2481/2025-2026

Champhai, dated 17th September 2025: Prime Minister Narendra Modi chuan vawiin khan Swasth Nari, Sashakt Parivar Abhiyaan a tlangzarh a. Prime Minister thusawi hi Video Conference hmanga live a thlir ho a ni a, he mi hnu hian Champhai District ah hman theih turin DC Conference Hall Keifangtlangah Champhai Bawrhsap Pu Mohammad Aaquib chuan Khuallian niin a hawng.

Khuallian Pu Mohammad Aaquib chuan hmeichhia, hmeichhe tleirawl leh naupangte tana an hriselna tih chakna tur ‘Swasth Nari, Sashakt Parivar Abhiyaan’ Central sorkarin a buatsaih chu lawmawm a tih thu a sawi a. Hmeichhe hrisel chuan chhungkaw chak leh hrisel a hrin avangin ngaih pawimawh a tul hle a, thalai hmathlir eng tak tak nei te tan an hriselna bakah zirlai tha taka an zir theihna tur atana hmanraw pawimawh tak anih avangin he hmalakna hi ngaihlua tangkai taka hmang turin District mipui te a chah a ni.

District Level Swasth Nari, Sashakt Parivar Abhiyaan hawnna inkhawm hi CMO Dr. Lalnienga'n a kaihruai a. He hunah hian Dy. CMO Dr Lalramhluna'n Swasth Nari, Sashakt Parivar Abhiyaan nih phung leh Champhai District-ah kalpui dan tur Power Point Presentation hmangin a hrilhfiah a ni.

Swasth Nari, Sashakt Parivar Abhiyaan hi Ministry of Health and Family Welfare (MoHFW) leh Ministry of Women and Child Development (MoWCD) tangkawp hmalakna a ni a, hmeichhia leh naupang hriselna puihna atana India rama hmalakna lian ber a ni a, Champhai Ditrict ah pawh vawiin September ni 17 atanga October ni 2, 2025 chhungin Champhai District huam chhung khaw hrang hranga District Hospital, Community Health Centre, Primary Health Centre, Urban Primary Health Centre leh Health and Welness Centre-ah te hmeichhiate hriselna endikna kalpui a ni dawn a ni.

Vawiina Swasth Nari, Sashakt Parivar Abhiyaan hawnna inkhawmah hian Line Department hrang hrang leh Nursing School Champhai Zirtirtute leh Zirlai naupang an tel tha hle a. Dr Zatluanga, District Medical Superintendent in lawmthu sawiin hawnna inkhawm a khar a ni.