2482/2025-2026

Aizawl the 17th September 2025: Vawiin khan Chief Minister Pu Lalduhoma chuan a office-ah Aizawl Western Side Bypass road laih mek thlirpuina meeting a nei a. Contractor te hnathawh tawh chin leh hmachhawpte chipchiar takin a sawipui.

Aizawl Western Side Bypass road hi PM DeVINE sum Rs. 500 Cr. senga thawh tur niin a thawk tur hian RG Buildwell Engineer Limited te chu thlan an ni a. Kawng hi kilometer 45 a thui niin tun thlengin Physical Progress hi 13.70% an nei tawh a. Kum 2028 kumtir lama zo hman tura beisei niin contractor hian an thawh zawh atanga chhiara kum 5 chhung an enkawl zui ang.

Leivung paihna hmun hi a vaiin hmun 23 vel neih a tul a. A ruala a zavai tana dumping site proposal hi siam a harsat avangin hna an thawhna hmasa tana an dumping site tur hmun pasarih chu pawmsak tawh an ni. Hna hi State Priority Project a ni.

Meeting-ah hian Pu TBC Lalvenchhunga, Adviser to CM, Pu Vanlaldina Fanai, Commissioner & Secretary to CM, PWD, Pu Lalmalsawma Pachuau, Secretary, Planning, Er. H. Zoramliana, E-in- C, PWD, contractor leh official pawimawhte an tel a ni.