Vawiin khan I&PR Auditorium, CHANEM Building ah Champhai District Mental Health Programme (DMHP) leh Mission Foundation Movement (MFM) tangkawp huaihawtin Champhai khawpui chhunga MJA member-te leh veng hrang hrang YMA Chanchinbu enkawltute pualin mahni intihlum venna ni, World Suicide Prevention Day hman a ni.

World Suicide Prevention Day hmanpuitu, Champhai District Information & Public Relations Officer, Pu Neng Thianlala chuan mahni intihhlum chung chang thuthar thehdarh dan diklo chuan mahni nunna lak tum mekte tan huaisenna a pek theih thu leh an tum puitlin tura fuihtu tha tak a ni thei tih hre reng chunga report ziak thin turin thuthar thehdarhtu kalkhawmte chu a chah a. Mipuite mamawh, Public Interest pek chu thuthar thehdarhtute mawhphurhna a nih rualin mite hriat chak zawng apiang ziah chu thil tullo a nih thu leh mahni nunna lak avanga chanchin thalo thehdarh a tul chang pawha nun beidawngte pui theitu tarlan tel zel chu Press Council of India kaihhruaina, Norms of Journalistic Conduct duhdan a ni, a ti bawk. DIPRO chuan Indian Psychiatric Society in mahni intihlumte chung chang thuthar thehdarh dan turah rawtna a siamte tarlangin thuthar thehdarhtu kalkhawmte chu chung kaihruainate chu ngaipawimawh zel turin a fuih bawk.

World Suicide Prevention Day puala inkhawm hi Senior Medical Officer, Dr. R. Lianmawia'n kaihruaiin kalkhawmte lawmna thu a sawi a. Champhai DMHP changtu Medical Officer, Dr. Lawrence Lalramenga Ralte chuan Champhai District Mental Health Programme hmalakna leh dinhmun tarlangin World Suicide Prevention Day hman chhante a sawi fiah a. Pi Jane Lalduhchhungi Vanchhawng, Clinical Psychologist, Champhai DMHP, chuan kumin World Suicide Prevention Day thupui, "Ngaihven la, Ngaihsak la, Tuam dam rawh," (Connect, Communicate, Care) hmangin Power Point Presentation nen thuthar thehdarhtute mawhphurhna leh tihturte zirtirna a pe a, Visual Media (TV) a mithi thih chhan tarlan chung chang bakah tual thahna leh mahni intihlum chanchin Chanchinbua chhuah dan chung changah sawihona tha tak neih a ni bawk. Vawiin World Suicide Prevention Day ah hian mahni kutzala thite sunna leh an chhungte tawrhpuina entirna turin Dr. Elizabeth Niang Tawi Mang, Psychiatric Social Worker, Champhai DMHP, kaihhruainain bati chhit (Candle Light Memorial) hun hman a ni bawk.

Champhai District Mental Health Programme hian kawng hrang hrangin hma a la a, Awareness Campaign bakah Free Clinic te buatsaih thin niin nikum February atanga kumin July thla thleng khan mi 298 an enkawl tawh a ni.