1318/2023-2024

Champhai the 31st July 2023 - Vawiin khan Kahrawt Community Hall, Champhaiah LAD leh PHE Department-te tangkawp buatsaihin 15th Finance Commission Convergence chungchang zirhona ni khat awh training neih a ni. Champhai Bawrhsap Pu James Lalrinchhhana chuan khuallian niin a hmanpui a ni.

Training ah hian Champhai District huamchhunga Village Council 62 President leh Secretary te an tel a ni.

Vawiin program Champhai DLAO Pu Moses Lalfakawma Tlau kaihhruaiah Champhai DC Pu James Lalrinchhana chuan thu sawiin Training on 15th Finance Commission Convergence chu khawtlang hruaitu VC-te tan intuaihriamna leh inrawnkhawmna hun tha tak a ni tiin VC kalkhawmte chuan an hlawkpui ngei theih nan uluk leh taima taka inzir turin a chah a. VC-te chu ram hmasawnna bulthuta awm, khawtlang kaihruai tura mipuite thlan tlin an nih angin mahni khawtlang theuh thatna tura thahnemngai taka thawk thin tur leh an hna kaihhnawih dan leh thupek hrang hrang (The Lushai Hills District (Village Councils) Act, 1953; The Lushai Hills District (Jhumming) Regulation, 1954; Mizoram Town (Sanitation) Rules, 1980; The Mizoram Animal (Control & Taxation) Act, 2014. etc) te bel taka hrechianga a nih tur ang ngeia kengkawh thin turin a chah a. An khawtlang theuh an kaihhruaina ah hmathlir thui tak nei tura chahin khua leh tui nihna lehkha an pek chhuah chungchang ah te pawh Dan ang ngeia fimkhur taka kalpui thin turin a chah a. An hmalakna hrang hrangte District administration hrilh hre fo thin tur leh an mamawh apiangte inthlahrung lova thlen thin turin a chah bawk a ni.

Vawiin training-ah hian Er ZD Dengthuama, EE, PHE pawhin thu sawiin, Geotagging, Open Defecation Free Plus (ODF+), Plan & Estimate, leh Gram Panchayat Development Plan (GPDP) Account Maintenance & Online Audit chungchang zirho a ni a. Pi H. Lalenkawli, DPM Champhai, Pi Julie C. Mawii, District Coordinator, Er Vanlallawma Colney JE PHE leh Pu C. Vanlalhruaia, LAD te Resource Person niin training an pe a. Hemi bakah hian Tuberculosis (TB) natna chungchanga hriat tur pawimawh Pi R. Lalmuanpuii, PPM Coordinator, District TB Control Society in zirtirna a pe bawk a ni.