1319/2023-2024

School Education Department, Government of Mizoram leh NCERT, Government of India chuan National Education Policy 2020 kum thum tlinna denchhenin 29th July, 2023 khan PM eVIDYA DTH TV Channel chungchangah Memorandum of Understanding (MoU) an ziak. Mizoram sorkar aiawhin Dr. Lalzirmawia Chhangte, IAS, Secretary, School Education Department chuan MoU hi Pragati Maidan, New Delhi-ah a sign a. He MoU hi Ministry of Education-a Minister of State pathum - Pi Annapurna Devi te, Dr. Rajkumar Ranjan Singh leh Dr. Subhas Sarkar te telpuina hnuaia ziah a ni.

He MoU-ah hian sorkar laipui chuan TV channel te a thlawna state te a pek tur thu leh state te chu a chhuah tur hrang hrang, zirlaite tana tangkai tur leh an textbook mil zirna puitu siam tura intiamkamna a tel.

India ram pum tana Education pual liau liaua Ministry of Education, Government of India in a duan TV channel 200 chuang chu a rualin ni 29th July, 2023 vêk khan hawn a ni a. Heng TV channel te hi India ram puma zirlaiten zirna inang leh intluktlang an dawn theihna tura ruahman niin, One Class One TV channel tih thupui hmanga siam a ni.

Mizoram hian TV channel 2 kan nei dawn a, chungte chu –

1. Elementary level tan Zirna Kailawn- Learning Ladder
2. Secondary level tan Zirna Lamtluang- Learning Pathway te a ni ang.