No.7730/2020-2021

Dated Champhai, the 8th March, 2021: Vawiin chawhnu khan Champhai District chhunga Village Council President-te pualin VC mawhphurhna leh tul dangte inhrilhhriatna hun I&PR Auditorium, CHANEM-ah buatsaih a ni.

He hun hmanpuitu Bawrhsap Pi Maria C.T. Zuali chuan 1954 kuma lal ban a nih hnuah ‘The Lushai Hills Autonomous District (Administration of Justice) Rules, 1953’ hmangin VC din a nih thu sawiin, sawrkar tih chu thil hrang daih ni loin mipuite hi kan ni a, lungthu pathum; dan hmanga rorelna Judiciary, dan kengkawhtu Executive leh mipui aiawh tura thlan Legislative-ah te a innghat tlat a ni, a ti a. VC te chu mipui thlan legislative hnuaia mi, a tul leh remchan dan ang zela dan siam theitute an nih thu a sawi a. Sawrkar pawn lam anga inngaihna awm thinte dah bova, sawrkar mi, sawrkar dan leh hrai kengkawhtu tur an nih inhre thar leh turin a chah a. Sawrkarin ti tura a beisei leh mawhphurhna an kuta a dahte hlen tura fuihin, dan bawhchhiate chu an chunga hremna lekkawh theih a nih thu leh VC thiah thlenga hmalak theih a nih thu a sawi bawk. 

VCP kalkhawmte chu thudik tana dikna ngaipawimawh fo tur leh sawrkarin inkaihhruaina a siamte ngaipawimawh thin turin a chah a. An rawngbawl sak mipuite hmakhua ngai chung zela thawk zel turin a sawm a ni. 

Champhai S.P Pu Lalrinpuia Varte chuan VC te chu dan leh thupek kengkawhtu an nih angin sawrkar tha tichaka khaiding tura theihtawp chhuah turin a ngen a. Champhai district hmasawn leh than zelna kawngah thahnemngai taka thawhhopuiah a sawm a ni. 

He hun hi Pu R.Lalnghakliana PD, DRDA & Addl. DC chuan a kaihruaia, Pi Esther Leihang, DLAO chuan kalkhawmte lawmna sawiin, VC te mawhphurhna a sawifiaha. Zawhna leh chhanna hun buatsaih chhunzawm a ni. 

He hunah hian Pi Maria C.T. Zuali DC, Pu Lalrinpuia Varte SP, Pu R.Lalnghakliana PD DRDA & Addl. DC, Pu C.Lalengliana Addl. SP, Pi Esther Leihang DLAO, Dr. Lallawmkima DIPRO leh VCP theuhte an tel a ni.