Kumin Village Council inthlanna tura inpuahchahna kalzelah vawiin khan Champhai District-a Assembly Constituency pathumte tan Village Council Draft Electoral Roll 2020 chu DC Conference Hall-ah District Election Officer Pu SL Naveen, IAS chuan a tlangzarh a, Political party aiawhte hnenah Copy khat theuhin a sem nghal a ni.

Tlangzarhna hun hi Pu SL Naveen chuan kaihruaiin, hun hlu tak senga kalkhawmte chungah lawmthu a sawi a. Draft Electoral Roll puahchaha tlangzarh mai theihna kawnga thahnemngai taka thawktu zawng zawngte fakawm a tih thu a sawi a ni. 

Pu Lalnunfela Chawngthu, Election Officer Champhai hnen atangin Village Council Draft Electoral Roll 2020 chanchin tlangpui  ngaihthlak a ni a. Thu thlen duh neite tan hun hawn anih dawn avangin hemi hun chhung ngeia thu thlen duh, dilna leh sawi duh neite tan tihfel hman angaih thu a sawi a. Mahni awmna hmun thlak duhte tan an awm duhna hmunah thla 6 (Ni 180) tal an awm angai a ni, a ti a. Village Level Officer (VLO) tinte chu Village Level Standing Committee din theuh tura hrilhhriat an nih tawh thu sawiin, NGO leh Political party tin atangin aiawh member 2 theuh an awm ang a, VLO-te kaihhruainain Electoral Roll felfai leh dik tak  siam turin hma an la dawn a ni, a ti bawk. 

Village Council Draft Electoral Roll 2020 tlangzarh takin a tarlan dan chu hetiang hi a ni.

Ruahman dan chuan March Ni 14 atanga 18, 2020 chhungin thu thlen duh nei emaw, dilna, zawhna leh thil hriat duh neite tan hun hawn a ni ang a. March Ni 19 atanga 25, 2020 thlengin siam that ngaite siam that anih hnuah, March Ni 26 atanga 30, 2020 thlengin khawla chhutchhuaha, tlangzarh mai theih tura peihfel tur a ni a. ViIlage Council inthlanna tura Electoral Roll hman tur leh  thar ber nibawk  chu March Ni 31, 2020 hian tlangzarh a ni ang.  MLA Final Roll-2020 February Ni 7, 2020 a tlangzarh tak, Champhai District la thendarh hma huapah khan Electors 87,629 an awm a,  Village Council Draft Electoral Roll 2020, Champhai District chauh huam vawiina  tlangzarh takah hian Electors 50,387 an awm a, a inthlauhna chu 37,242 a ni. 

Tun dinhmunah Champhai District chhunga Assembly Constituency 3 ah Village Council 62 awm mekin, Champhai Jail Veng leh  Ruantlang Mual Veng-te chu Village Council tunhnaia siam tharte an ni.

In 200 chin hnuai lam Veng/ khua tan VC Member 3 a neih theih a, heng zinga 1 hi hmeichhe tan hauh sak a ni a. In 201 atanga 500 inkar te’n VC member 5 nei theiin,  hmeichhe tan seat 1 hauh sak  a ni a. In 501 atanga 1000 inkarah VC member 7, hmeichhe tan seat 2 hauh sak a ni a. In 1000 chunglam te’n VC member 9 nei theiin, heng zinga seat 3 te chu hmeichhe tana hauh a ni. 

Vawiin Village Council Draft Roll 2020 tlangzarhna hunah hian Election Official-te, Political party aiawhte leh Chanchinbumite an tel a ni.