Kumin Village Council inthlanna tura inpuahchahna kal mek zelah vawiin khan Village Level Officer (VLO) -te pualin I&PR Auditorium, CHANEM-ah District Election Office buatsaihin training neih a ni. Training hawnna hun hi Pu Lalnunfela Chawngthu, Election Officer chuan kaihruaiin, Pu Mark Lalthanliana, Addl DC Champhai & ERO, 24-Champhai South A/C chuan training hi a hawng a ni.

Pu Mark Lalthanliana chuan Village Council inthlan kalpui hna chu district administration-in kum 2015 atangin Local Administration Department kut atangin a lakchhawn thu a sawi a. Kalkhawm tam zawkte chu tawnhriat ngah tak takte nimahse, a then tana thil thar anih angin training buatsaih tur chu inzirna leh intuaitharna atana hmang turin a chah a. Village Council Member thlanna tur chu kalphung thar hlak ni lo mahse, thil thar tlem her danglam a awm thin avangin ngun taka inzir turin a fuih a. Champhai District-ah MLA leh MP inthlante hlawhtling taka kalpui anih tawh thu pawh sawiin, Village Council inthlan pawh felfai leh hlawhtling taka neih anih a beisei thu a sawi a. Kalkhawmte chu rilru leh tih takzeta training hun hmanga, hlawkpui tum theuh turin duhsakna a hlan a ni.

Training-ah hian Pu Lalnunfela Chawngthu, Election Officer Champhai chuan VLO kalkhawmte hnenah form hrang hrang awmzia leh hman dante a sawifiah bakah hriat tul angte chipchiar takin a sawifiah a ni.

He hunah hian Pi Ethel Rothangpuii, Project Director, DRDA Champhai & ERO, 23-Champhai North A/C; Election Official dangte, 23-Champhai North A/C, 24-Champhai South A/C huamchhunga VLO te leh 25-East Tuipui A/C huamchhunga VLO thenkhat te an tel a, training chhimtu VLO-te hi an vaiin mi 56 an ni.