Vawiin khan Champhai DC Office a NIC Conference Hall-ah Champhai District chhunga Assembly constituency panga a inthlanni a duty turte Computer hmanga rualkhai taka semrualna neih a ni. He semrualna thawh hnihna hmang hian Champhai District chhunga Vote thlak ni a Polling Station 137 a duty tur Polling official mipa 664 te chu  semrual an ni a, an ni  bakah hian  Hmeichhe hlang duty na tur Polling Station Constituency tinah pakhat theuh awm tur anih avangin Polling Official hmeichhia 28, reserve  tiamin an awm dawn bawk a ni. 

Vawiin Second randomisation hmang hian Constituency 5 a Polling Official-te semrual anih bakak Polling party turte pawh reserve chhiar telin team 178 ah  rualkhai taka sem nghal niin Polling party team tinah hian Official Pali Presiding Officer, First, Second leh Third Polling Officer-te an awm zel dawn a ni. Polling Official vawiina group hrang hranga thente duty-na tur Polling Station chu inthlan hma ni hnih velah third randomisation of Polling Official hmangin neih leh tur a ni ang.

Vawiina Second Randomisation of Polling Official neihnaah hian Pu Debashis Das,IAS, General Observer  for 21-Lengteng (ST) AC & 22-Tuichang (ST) AC; Pu Narander Kumar Meena, IAS, General Observer for 23-Champhai North (ST), AC, 24-Champhai South (ST) AC &  25-East Tuipui (ST) AC; Dr Naveen Aggarwal,IAS, District Election Officer, Champhai bakah RO, ARO leh Election Officer-te an tel a ni.

Champhai District chhung A/C 5 huama Polling Station 137-ah hian venhimna thuahthip pek ngai (Vulnerable) Polling Station 10 (21-Lengteng A/C-ah Khawkawn PS,  Mimbung PS 1 & 2),  (23-Champhai North A/C-ah Vaikhawtlang PS,  Hnahlan PS 1 & 2,  25-East Tuipui A/C-ah Vaphai PS 1 & 2,  Saikhum PS leh Thekpui PS) thlanchhuah niin,  22-Tuichang A/C huama Lungtan PS chu vilbik ngai (Critical)-ah puan a ni bawk.