Vawiin khan Association for Voluntary Blood Donation (AVBD), NSS Govt GM HSS leh District Hospital Champhai tangkawp buatsaihin World Blood Donor Day 2019 chu Govt. GM Higher Secondary School, Champhai Vengsangah hman a ni a. He hunah hian Pu VL Chama Hnamte President, Sub-Hqtrs YMA Champhai chu  khuallian a ni a,   ‘Safe Blood for All’ tih thupuia hun hmanah hian  Govt. GM Higher Secondary School NSS ten thisen pek runpui an nei a ni.

Pu VL Chama Hnamte chuan a thlawna thisen phal taka   pek hmangin nunna tam tak chhan anih thin thu leh a pe tu ngei chhan nan pawh hman a nih thin thu a sawi a.  Zirlai kalkhawmte chu thiante hmaizah avang emaw thiante nawrna avanga sual khawiha an taksa tihchhe lo tur leh an zahawmna tichhe lo turin a fuih a, ruihhlo khawih  thalai tam tak chuan midang chhan nan an thisen an pe ve thei tawh lova, chutiang mi chu ni loh tum tur leh a tam thei ang ber thisen pe turin  a chah a. Sub-Hqtrs YMA President chuan YMA chu tanpui ngaite tanpuitu a anih angin  thisen mamawh damlote thisen pek an nih theihna turin Branch hrang hrangah  thisen pek hun bi a tahtawla siam thin anih thu sawiin, Mizoram chu India ramah a thlawna thisen pe tam kan nih theihna turin Zokhawpui Champhaiah bul tan a,   za a za  a thlawna thisen pek kalpui    tum anih thu a tarlang bawk.

Dr. J. Lalramchhuanga, Consultant pawhin thusawiin, sawrkar hmalaknain Blood Bank-in hma a sawn zel a, Blood Bank a mamawh awm apiang  intodelh  a ni, a ti a. Midangte tana inphalna leh midangte tanpui hi mihring thiltih ropui berte zing a mi anih thu sawiin, zirlai kalkhawmte chu an zirna leh  thiamna   chu midang tana hmang thiam turin a sawm a. Midang tana malsawmna ni turin  hriselna vawn that a pawimawh thu leh mahni invawng a, hriselna tichhe theitu ei leh in leh ruihhlo engmah ti lo turin a chah a, hriatna leh thiamna hi finna a nih loh thu sawiin Pathian tih tlat chu finna bulpui anih zawk thu a sawi a. Dr J.Lalramchhuanga chuan thla tin District Hospital-ah thisen Unit 80 atanga Unit 120 mamawhtute tan an pek chhuah ziah thu  leh mamawh phuhru tura  thisen an mamawh reng thu a tarlang bawk.

Vawiin hun hman hi Dr. Zatluanga, President AVBD Champhai  chuan a kaihruai a, Pu C. Zaihmingthanga, Secretary AVBD hnen atangin report ngaihthlak a ni a. World Blood Donor Day puala hun hmannaah hian Thisen pe tha School, Kohhran leh NGO mi 19 te hnenah chawimawina Certificate hlan an ni.

World Blood Donor Day puala hun hman zawhah Blood Donation Camp buatsaih zui nghal niin,  mipa 20 leh hmeichhia 14 ten,  thisen Unit 34 an pe thei a ni.