Ni 24 May 2019-a Task Force for Government Complex Luangmual thukhawm chuan Deputy Commissioner, Aizawl in Luangmual Local Council huam chhung, Sawrkarin Capital Expansion Project atana ram a lo valh tawh chhungah Sawrkar phalna lo chuan mi tu mahin in sak loh tur tih order chhuah se tiin a rel a. He  thu tlukna ang hian vawiin khan Aizawl Bawrhsap Pu Vanlalngaihsaka chuan  thupek a chhuah a ni.

Luangmual leh Tanhril leh Sakawrtuichhun VC huam chhung ram te hi kum 1971-ah daih tawh khan Mizo District Council chuan Section 3(1) of the Lushai Hills District (House sites) Act 1953 tlawh chhanin Executive (Rev) Order No. 28 of 1971 Dt. 23.12.1971 ti chhuakin Protected Area-ah a lo puang tawh a ni.

He thupek hian Luangmual, Tanhril leh Sakawrtuichhun Village Council-te ram huam chhungah Executive Committee, Mizo District Council phalna lo chuan in sak emaw sumdawn nan emaw huan siam nan emaw ram an pek theih loh thu a lo chhuah tawh a. (Vide No. Rev.1/71/2206-15 Dt. 23-12-1971)

Kum 1972 khan Mizo District Council chuan phalna la hmasa lova Luangmual VC in in hmun a lo pek zawng zawng pawh a sut sak leh vek a ni. (Vide No. DLR. 24/72/289 Dt. 18-03-1972)

Kum 1976 ah pawh Protected Area chhunga Luangmual VC-in Mizo District Council phalna la lova in hmun a lo pek zawng zawng chu a sut leh vek a. (Vide No. DLR/Misc-2/75-76/7 Dt. 26-02-1976)

The Mizoram (Prevention of Government Land Encroachment) Act, 2001 Section 3 chuan Sawrkar ram chhungah Sawrkar phalna nei lova kut.lo thlak emaw lo inbenbel ve ngawt emaw a khap bawk a.

Chuvangin, Section 3(1) The Lushai Hills District (House Sites) Act, 1953 hmanga "Protected area" a puan tawh ram chhungah mi tumah in Sawrkar phalna lo chuan in sak phal a ni lo tih kan in hriattir e.He thupek awih lo chu dan angin a chungah hma lak a ni ang.