Vawiin khan Mizoram Govt. Adhoc Aided High School Teachers Association (MIGAHTA) Special Conference chu Chanmari YMA Hall, Aizawl-ah neih a ni a, School Education Minister Pu Lalchhandama Ralte-in khuallian niin a hmanpui.

Pu Lalchhandama Ralte chuan he Special Conference-ah hian thusawiin Zirtirtu chu tun hma lamin mipui vantlangin an zah leh an thlir, an thu leh hla pawh an ngaihchan an ni a, tunah erawh chuan sawrkar hnathawk pangngai angah miin an ngai lek lek tawh mai a, zirtirtu tam takin mahni inpekna tak tak tel lovin hlawh hmuh nan ringawt an thawk niin a hmuh thei a. Zirtirtute hian kan rawngbawl mipuiten engtinnge min thlir tih ngaihtuah fo a tul a ni a ti.   Zirtirtu kalkhawmte chu kan ram tan fa duhawm tak tak hring chhuaktu ni tur leh chumi atana zirtirtu nihna hmang tangkai turin a fuih a. Zirtirtute chu Missionary rilru pua, a hun taka School thleng turte, class lakah pawh zawmthaw lo turte, mahni subject theuhah tui taka zirtir thei turtein a chah a. Naupangte chu zirtirna dik pe a, an thinlungah nundan phung tha te tuha, ram mamawh hrilh a, an kalkawng tur kawhhmuh a, tumruhna leh huaisenna tuh thin turtein a chah a ni.

Minister chuan MIGAHTA member kalkhawmte chu dinhmun tha zawk an beisei chu sawrkarin a hriatthiampui thu leh sorkar ring ngam turin a hrilh a, sawrkarin a phak ang tawk tawkah hma a lak tur thu a sawi. School Education-ah hian dinhmun chhe zawka awmte an tam a, Sawrkar Budget mila kal hmasak phawt a tul thu leh hmanhmawh hleihtheih anih loh dan te sawiin fa u chan chang thiam turin a chah a, sawrkar dinhmun hrethiam turin a chah bawk a ni. 

MIGAHTA Special Conference hi an pawl Vice President Pu David L.C.Chhakchhuak a’n a kaihruai a, District hrang hrang atangin an member-te an kalkhawm a ni.