Vawiin khan World Blood Donor Day, MSACS leh Association for Voluntary Blood Donation (AVBD) te buatsaihin Dawrpui Multipurpose Centre, Aizawlah he ni pual hian hun hman a ni Dr ZR Thiamsanga, MLA chu Khuallian niin he hun hi a hmanpui.
Kuallian Dr. ZR Thiamsanga, Vice Chairman, Health & Family Welfare Board chuan thisen hi a tlukpui mithiamte pawhin an la siam chhuak theh loh avangin mihring kan awm chhung hi chuan thisen pek hi a bang tak tak dawn lova, thisen pe thin te pawhin vawi khat mai a tawk lo tih hi hre thar ang u,” a ti a ,”India ramah thisen vawi 100 chuang pe tawh Centurion Donor hi an awm nual laiin Mizote zingah kan la awm lova, a pe tam ber hian vawi 70 vel an pe tawh a. Kum 18-65 chhunga regular taka thisen kan pek chuan kan dam chhungin vawi 188 kan pe thei a, Centurion Donor ni thei turin thalaite ka chah duh che u a ni,” a ti bawk. He ni puala School naupang leh thalai kalkhawm te chu kum 18 an tlin veleh thisen pe thei turin an hriselnate vawng thaa, ruih theih thil leh sex hman khawlohna lakah inthiarfihlimin, midangte tana malsawmna ni thei turin a chah a. World Blood Donor Day hi thisen petute Ni a nih angin thisen petute hi kan “hero” in ni a, kan chhuang takzet che u a, in hlutna hre thar lehin thisen pe tura inhlan tharna ni atan hmanga midangte tan malsawmna ni zel turin khuallian Dr ZR Thiamsanga hian a chah bawk a ni.
He ni puala hun hman kaihruaitu MSACS Project Director, Dr. Lalthlengliani chuan kal khawmte lawman thu sawiin, World Health Organisation (WHO) chuan ,”Kum 2004 atang khan thisen petute pual bik ni hi huaihawtin, Blood group hmuchhuaktu, Karl Landsteiner birthday June ni 14 hi World Blood Donor Day atan a puang a. He ni hi kum tin Khawvel ram hrang hrangah hman a ni thin a, Mizoramah pawh kum 2007 atang khan kum tin kan lo hmang ve ta a ni,” a ti a, “Mizoram chu HIV positive tamna ber state niin, thalaite zingah HIV hrik pai kan tam hle a. Chutih rualin thalai tam tak ruihhlo leh sex laka fihlim, a hun taka thisen pe thei tam tak kan la awm a, hei hi damlote tan a thlamuan thlak em em a ni” a ti bawk.
Dr Lalthlengliani chuan,”HIV inkai chhawnna kawng li zingah Thisen thianghlimlo dawn atanga HIV kai lohna turin NACO chuan Blood Transfusion Services a duanga. Hei hian Blood Bank tih changtlun te, test kit leh Blood bag a thlawna pekte, Voluntary Blood Donation promote te, Quality Improvement te a kal pui a. Kum 2010 khan NACO leh Mizoram sawrkar hmalaknain Mizoram district zawng zawngah Blood Bank kan neih theih bakah license pek vek an ni a, thisen pek kawngah hma kan sawn zel a ni, a ti a,” Tunah hian Mizoram pumah Blood Bank 11 kan lo nei ta a, nikum 2018-2019 a thisen kan hman ral t chu unit 27079 a ni a, kumin pawh hian hetiang zat vel hi mamawh leh tura chhut a ni,” a ti bawk.
Vawiin World Blood Donor Day thupui “Safe blood for all” sawitu, AVBD President Pu C. Lalnunnema chuan,” Thupui hi Mizo tawng chuan ‘Mitin tan thisen thianghlim’ tihna a ni a. Thisen pek hrim hrim piah lamah thisen thianghlim chu kan thupui ber a lo ni ta a ni,” a ti a. Thisen inpek chungchang inkaihhruaina dana thil pawimawh tak chu - Damlo tana thisen pek tur chu a thianghlim ngei a ni tih hriat chian hnuah chauh pek tur’ a ni a. Chuvangin, thisen pek hmain tih ngei ngei ngai (Mandatory Test) chi hrang hrang - HIV, Hepatis B & C, Malaria, Syphillis test te paltlang hnuah damlo hnenah pek a ni thin tih a sawi bawk.
Pu C Lalnunnema chuan ,”Mizoramah a huhova thisen pek kan uar ang huin Regular Blood Donor (thla thum dana thisen pe zat zat thin) an tam tawk lova. Kum 2018-2019 chhung khan a huhova pek (Donation Camp) atanga thisen hmuh chu zaa 70 a ni a, zaa 30 chu replacement donation leh mimal tlawmngaite pek a n,” a ti a,” Blood Bank-ah Thisen Thianghlim a awm reng theih nana pawimawh ber chu Regular Blood Donor tam tak neih hi a ni. Camp atanga kan hmuh hian kan thisen mamawh a phuhruk zo lova. Chuvangin, damlo ten thisen thianghlim an dawn theih nan Donation Camp huaihawt kher lo pawhin regular taka thisen pek thin hi a pawimawh tak zet a ni,” a ti.
Pu Lalrinkima, General Secretary, AVBD chuan Mizorama thisen pek dan report pein,” Kum 1993 khan Voluntary Blood Donation chu zaa 1.79 chauh a nih laiin kum liam ta, 2018-2019 chhung kha chuan 86.54% a lo ni ta. 100% voluntary donation kan neih theih nan pawl hrang hrangte hian Blood Donation Calendar siam theuh thei ila tih hi AVBD chuan kan duhthusam a ni,” a ti.
Report atanga a lan danin kum 2018-19 chhunga thisen lakkhawm zawng zawng chu unit 27079 a ni a, chung zingah chuan Voluntary Donation hi unit 23434 (86.54%) niin Replacement Donation hi unit 3645 a ni.
Voluntary Donation dawnna hrang hrangte chu;
Kohhran Thalai pawl - 8508 units
Zirna In hrang hrang - 5943 units
YMA - 1713 units
A dangte - 4317 units
Mimala pe - 8073 units (29.81%)
TOTAL - 23434 units
Vawiin hian Voluntary Blood Donation lawmman sem niin a hnuaia tar lan ang hian lawmmante sem a ni:
A) Overall Category - Mizoram puma pawl hrang hrang zinga thisen pe hnem zual pathum :
1) State NSS Officer cum Deputy Secretary, NSS Cell, Mizoram - 5365 units.
2) Kristian Thalai Pawl (KTP) - 4193 units
3) Mizoram Thalai Kristian Pawl (MTKP) - 2104 units
B) Civil Hospital, Aizawl, Synod Hospital, Durtlang leh Falkawn Hospital Blood Bank-a thisen pe thate
Religious Category 1) TKP Co-ordination Committee, Aizawl - 441 units
2) Territorial Salvation Army Youth (TSAY)- 297 units
3) Adventist Youth Federation (AYF) - 183 units
Education Institution Category 1) Pachhunga University College - 794 units
2) Government Hrangbana College - 658 units
3) Government Aizawl College - 390 units
YMA Category 1) Keifang Joint YMA - 118 units
2) Aibawk Branch YMA - 107 units
3) Rulchawm Branch YMA - 66 units
4) Bethlehem Vengthlang Branch YMA - 66 units
Miscellaneous Category 1) Police Training Centre, Thenzawl - 181 units
2) Mizoram Police - 100 units
3) Mizo National Youth Front Gen. Hqrs - 94 units.
World Blood Donor Day hi Mizoram district hrang hranga hman a ni a, Aizawla he ni puala hun hmanah hian Rev. Dr. K. Lallawmzuala, Leader, CKTP chuan hunserh a hmang a, Dr. Eric Zomawia, Mission Director, NHM in kalkhawmte hnenah lawmthu a sawi a ni.
