A thlawna thisen petute ni World Blood Donors Day chu vawiin khan Lungleiah pawh hman a ni a, Association for Voluntary Blood Donation, Lunglei Branch buatsaihin he ni puala inkhawm hi Doctor’s Conference Hall, Civil Hospital-ah neih a ni. Kumin World Blood Donor’s Day thupui chu “Safe Blood for All” – Thisen Thianghlim Mi Tin Tan tih a ni. He hunah hian Lunglei DC Pi K. Lalrinzuali chu khuallian a ni.

Lunglei DC leh Association for Voluntary Blood Donation (AVBD), Lunglei Branch Patron Member ni bawk Pi K. Lalrinzuali chuan sum leh pai seng lova mite tanpui theihna hlu ber chu a thlawna thisen pek hi a ni tiin Mizoram hmun hrang hrang ah YMA, Zirna in, kohhran hrang hrang leh pawl dangte hmalknain a thlawna thisen pek kan uar hi a lawmawm takzet a ni, a ti a. Thil tha tih chu mahni ah a let leh thin a ni tiin tanpui ngaite tanpui nachang hriat te, midang tana inpekna rilru put te hi mi changkang zia a ni, a ti bawk. Kalkhawmte chu a thlawna thisen pek uar deuh deuh tur leh mahni pek mai duhtawk lova midang te pawh thisen pek hlutna zirtirtu leh kawhhmuhtu ni theuh turin a chah a ni.

Vawiin inkhawm hi AVBD Lunglei President leh Civil Hospital Medical Superintendent ni bawk Dr SR Ngurchamliana’n a kaihruai a. Pu Lalbiakthanga Chawnthu, Chaplain Civil Hospital Lunglei in hunserh a hmang a. Pu Lalrotluanga, Sub Hqrs YMA President leh Member, AVBD, Lungei chuan lawmthu sawina hun a hmang bawk.

Pu H. Lalthangliana, Secretary,AVBD, Lungei atangin report ngaihthlak a ni a.  AVBD, Lunglei Branch hi 29th October 2001-ah din niin khawtlang tan leh damlo tan he pawl hi tha takin a kal chho zel a ni. AVBD hmalakna  thenkhat sawiin damlo thisen mamawh ten thisen thianghlim tha dawn an neih theih nan kohhran thalaite, pawlte leh NGO ah te awarerness campaign neih thin a nih thu a tarlang. Blood Bank in a mamawh em em thisen phur thei motor(Van) Blood Donation Van chu MP fun kaltlanga lei a ni a. Ni pual bik Valentine Day,World Blood Donor leh World Blood Donation Day ah te thisen pekna hun siam a ni thin a, thisen pe tha te chawimawina hun hman ani bawk thin a ni.

Dr Lucy Ramhmingliani Renthlei, Lunglei Civil Hospital Blood Bank atangin Technical Report ngaihthlak a ni a. June 2017 atanga May 2018 hun chhungin thisen unit 2087 dawn niin June 2018 – May 2019 hun chhungin thisen unit 2470 dawn a nih thu a tarlang.